Sindikatuek gogor salatu dute atzo A-8 autobidean, Zaldibar parean, izandako istripua. Administrazio publikoek azpi-kontratatutako bi langile hil ziren, Jose Alberto Ayo eta Pedro Maria Parola leioaztarrak, furgoneta batek harrapatuta. Heriotza horiek salatzeko, astelehenean, martxoak 29, kontzentrazioa egingo dute Leioan. Hitzordua 19:30ean jarri dute, Bulebarrean. Bitartean, ELAk nabarmendu duenez, "Diputazioari dagozkion lanak egiten ari ziren, azpi-kontratatuta egon arren". "Diputazioan azpi-kontratazioak ohikoak dira eta gu horren kontra gaude, izan ere, baldintza prekarioak dira eta beharginek lan-karga handiegiak dituzte eta horrek istripuak errazten ditu", erantsi dute. Argazkian, otsailaren 16an Julio R. P.-ren heriotza salatu zuen LABek Sopelan / © Sopela.net.
ESK-k azpimarratu du "oso arriskutsua" dela "120 kilometro ordu baino gehiagoko abiaduran zirkulatzen den autobide batean lan egitea". Hori dela eta, segurtasun neurri berriak eskatu ditu, hala nola, "zirkulazio gutxiago dagoen orduetan eta egunetan lan egitea eta Poliziaren patruilak egotea beharginak lanean ari direnean". Bestalde, CCOOk ere esan du orain arte hartutako neurriak ez direla nahikoak. "Autobideetan ari diren beharginek euren bizia egunero arriskuan jartzea ahalbidetzen ari dira", salatu du. Jesus Uzkudunek esan duenez, "amorrua ematen du ezbehar hauek zorte txarraren ondorio direla edota lan-istripuak ekidin ezinak direla entzun behar izateak".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun