“Hitzartuta dugu batzarra enpresarekin, auzotarren eskariak, batez ere autoak Ollarretxetik sartzearena, betetzea oso komenigarria dela esateko. Auzotarren eskariak beteta, jarduera honek izango lituzkeen abantailak baloratu beharko lituzke enpresak”, adierazi zuen atzo Landak.
Inguruko auzokideekin zenbait batzar izan eta gero, Algortako Aldapa auzoan, antzinako Azaldegui okintza-lantegian beilatokia jarri nahi duen enpresaren arduradunei helaraziko dizkie bizilagunen eskariak Getxoko Udalak. Besteak beste, beilatokia errausketa-labe bihurtu ez dadila, autoak beilatokira Ollarretxe kaletik sartzea, eta instalazioak estetika atsegina eta ingurukoari egokitua eduki dezala eskatuko diete, Imanol Landa alkateak atzo adierazi zuenez. Bestalde, Udal Gobernu Taldeak Hiri Antolaketarako Plangintza Orokorra (HAPO) aldatzea aurreikusten du, Getxon errausketa-labeak ipintzea galarazteko. “Beilatoki jarduera baimenduta dago hiri-planeamenduan, baina gure konpromisoa argia da: lanean ari gara udalbatzara HAPOren aldaketa egiteko proposamena eramateko, hiri-lurzoruan horrelako azpiegiturarik ipintzea galarazteko. Debeku hau udalerriko gainontzeko eremuetara zabaltzeko aukera ere aztertuko dugu”, gaineratu zuen tokiko agintariak. Gaurko udal batzarrerako, mozio bana aurkeztua zuten Getxoko PPk zein PSE-EEk, horiek guztiak eskatuz. Argazkia: cc-by Wickenden.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun