Orain arte udal batzar amaierako erregu eta galderetako txandan baino ez du parte hartzerik izan Getxoko ezker abertzaleak; 2007ko maiatzaren 27ko udal hauteskundeetarako ANVko zerrenda legez kanpo utzi zutenetik. Gaurko osoko bilkuran ere erregistroan aurkeztutako mozioa irakurri bai, baina hori eztabaidatzerik ez dute izan 3.247 getxoztarrek aukeratutako bi hautetsiek, Mari Espe Fuertesek eta Christian Reinickek.
Telletxe plazari buruzko mozioa:
Ofizialki Algortako Geltoki Plaza deiturikoan Udalak uda honetan burutu nahi dituen espazioen berrantolaketa lanak direla eta, kontuan hartuta:
– Kaleaz eta aisialdiaz disfrutatzeko udaroa dela leku publikoetan jende eta haur eta gazte gehien biltzen duen urtaroa,
– Beste plaza garrantzitsua den Txiki eta Otaegikoa eta bere inguru osoa jadanik lanengatik itxita dagoela,
– Uztaila bukaeran ospatzen diren Algortako jaiak herritarrek kalean eta leku egokian ospatu nahi dituztela
– Eta azkenik denonak diren espazio publikoak nolakoak nahi ditugun, denon artean aztertu eta erabakitzea onuragarria dela
Getxoko Ezker Abertzaleko Udal Hautetsiok Udaleko Osoko Bilkurari akordiorako hurrengo proposamena helarazten diogu:
1) Algortako Geltoki Plazan uda honetan erreforma lanik ez egitea
2) Getxoko Udalak Algortako Geltoki Plaza erreformatzeko duen proiektua jendaurrean erakustea
3) Algortako Geltoki Plazaren diseinua erabakitzeko ariketa parte hartzailea burutzea, plazaren oraingo egoeraren, Udalak plazarako duen proiektuaren eta bestelako ideiak eta iradokizunak jaso ondoren hirugarren proiektu baten artean herri kontsulta bidez jendeari erabakitzen utziz.
Telletxe plazan udan obrarik ez egitea eskatu dio Getxoko Udalari ezker abertzaleak
Ohiko lez, gaurko udal batzarrean, galde-eske txandan baino ezin izan dute irakurri aurkeztutako mozioa Getxoko ezker abertzaleko hautetsiek. Uda honetan, Telletxe plazan eta inguruan lanak egingo direla jakinarazi die inguru horretako merkatariei eta Algortako San Inazioetako Jai Batzordeari Getxoko Udalak. Nolako lanak egin nahi dituen ez du era zabalean argitaratu tokiko erakundeak; eta kontuan hartuta Algortako beste gune garrantzitsu bat, San Nikolas plaza eta aldameneko Getxo Antzokiko orubea eta plaza, zeharo itxita daudela, "auzo bereko espazio publiko garrantzitsuenetan aldi berean lanak egitea ideia ona denik" ez dute uste ordezkari independentistek. Gauzak horrela, ofizialki, Geltoki plaza den horretan udan erreforma lanik ez egitea eskatu diote Udalari. Imanol Landa alkateak, baina, "udan edo uda aurretik" hasiko direla erantzun du. "Obrak udan egin ala ez hausnartu eta hainbat kontsulta egin ostean, merkatariek Gabonetarako amaituta nahi dituztela" erabili du argudiotzat. Bestalde, Telletxe plazaren diseinu berria erabakitzeko ariketa parte hartzailea egiteko proposamena bere erantzunean "aipatu ere ez izateaz" kexu dira ezker abertzaleko hautetsiak. Argazkian, arte erakusketa uda bukaeran Telletxen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun