Joan den ostiralean, Xabier Galdeanori omenaldia egin zioten 250 bat lagunek, Algortako Telletxe plazan. Izan ere, gaur, asteartea, bete dira 25 urte "GALen izenean Espainiako polizia indarrek Donibane Lohizunen hil eta 25 urtetara", Uribe Kostako Amnistiaren Aldeko Mugimenduak adierazi duenez. Azken ostiraleko ekitaldian eta Etxeraten adierazpena irakurri ondoren, omenaldi xumea egin zitzaion: txalapartariak, dantzariak, bertsolariak eta AAMren irakurketa. "Eusko gudariak" abestuta amaitu zen ekitaldia. "Xabier Galdeano figura gogora ekarri zen eta Xabier Galdeanoren hilketatik Jon Anzaren oraingo hilketa eta errepresiora etorri ginen, luzaro Euskal Herriak pairatzen duen estatuetako errepresio eta biolentzia politikoari amaitu beharra duela exijitzeko", azaldu du errepresioaren kontrako erakundeak. Bihar, unibertsitate mailan, hileko azken asteazkenean egingo dituzte presoen aldeko mobilizazioak. Gauzak horrela, 11:30ean abiatuko dira manifestazioan, Leioa eta Erandioko campuseko kafetegitik, euskal preso politikoen ikasteko eskubidea aldarrikatzeko asmoz. Bitartean, dagoeneko Xabier de la Maza Peña Gorlizko euskal preso politiko gaztea Alacanteko Fontcalent espetxean daukatela zabaldu du Plentzia, Gorliz eta Lemoizko ezker abertzaleak. Etxetik 835 kilometroetara. Argazkian, Xabier Galdeanoren irudia.
Eskualdeko gainontzeko herrietan ere egin ziren elkarretaratzeak, martxoko azken ostiralean. Besteak beste, Leioan 61 lagun batu ziren Bulebarrean; Itzubaltzeta / Romon 60 inguru Xake plazan; Lemoizen 15 Armentzako bus geltokiaren aurrean; Plentzian 14 zubi ondoko Pirui plazatxoan; eta Urdulizen 12 BBVAren aurrean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun