Gizon gazte bat atxilotu dute metro geltokietan diru-zorroak lapurtzea egotzita
Ertzaintzak atzo arratsaldean 28 urteko gizon bat atxilotu, zuen Bilbon, iruzur eta lapurreta delitu jarraitu bat leporatuta. Eusko Jaurlaritzaren Herrizaingo Sailaren arabera, Metro Bilbaoko geltoki anitzetan diru-zorroak lapurtu ohi zituen atxilotuak; eta ostutako kreditu-txartelekin garraio bonuak erosten omen zituen. Atzo (astelehena) arratsaldean, Indautxun, metroko segurtasuneko zaintzaileek ustezko zorro-lapur bat atxiki zutela zioen abisua jaso zuen Ertzaintzak. Ostutako kreditu-txartel batekin metroko bonu bat erosi nahian zebilela harrapatu ei zuten susmagarria. Bertaratu ziren agenteek ustezko lapurra identifikatu zuten. Ustez iruzur eta lapurreta delitu ezberdinak egiteagatik bilaketa agindu bat zuela jabetu ziren, polizia iturriek diotenez.
Metroko geltokietan ematen ziren eta horren antzeko ezaugarriak zituzten lapurretei buruzko salaketa kopuruak gorako joera zuela ikusita, ikerketa bat abiatu zuen orain gutxi Ertzaintzak. Kasu guztietan lapurreten egileak diru-zorroak ostu ohi zizkien emakumezkoei, irekitzeko errazak ziren poltsak zeramatzatenei gehienbat. Batez ere, zorroetatik dirua eta kreditu-txartelak hartu ohi zituen. Biktimak lapurretaz ohartu eta txartelak baliogabetu aurretik, metrorako garraio bonuak erosteko erabiltzen omen zituen. Herrizaingo Sailaren arabera, garraio zerbitzuaren segurtasun kamerek hartutako irudiei esker egiaztatu zen atxikita zuten susmagarriaren aurkako bilaketa agindua zuela Ertzaintzak. Hortaz, atxilotu egin zuten iruzur eta lapurreta delitu jarraitu bat leporatuta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun