Ertzaintzak herritarren laguntza eskatu du Erandion hildako txirrindularia identifikatzeko
Atzo, astelehena, Erandion hil zen txirrindulariaren gorpua identifikatu ahal izateko daturen bat duten pertsonen laguntza eskatu du Ertzaintzak. Eusko Jaurlaritzaren Herrizaingo Sailak zabaldu duenez, hildakoa C-6311 errepidetik (itsasadar paretik) bizikletan zihoala, erori egin zen eta handik gutxira zendu zen. Txirrindulariak ez zeraman inolako dokumentaziorik aldean, horregatik ezin izan da oraindik nor den jakin. Hildakoaren nortasuna ezagutzeko zailtasunak ikusita, berari buruzko daturen bat eman dezaketen pertsonen laguntza eskatu dute. Gizonezkoa da, zuria, 55-60 urte inguru ditu eta gorpuzkera normala. Eskuineko eskuko hatz erakusleko azken falangea falta du. Heriotzaren unean, kamiseta, kulot eta mallot luzeak zeramatzan; baita txirrindulari zapatilak eta kolore gorriko buruko kasko bat ere. "Oscar" eta "Mila" izenak idatzita zituzten domina bi zeramatzan. "26-12-64" data zegoen grabatuta aldeetako batean eta Ama Birjinaren irudia bestean. Orbea markako bizikleta batean zihoan, Mitis modelokoa, beltza eta urre koloreko hizkiekin. Hildako gizonaren inguruko daturen bat ematerik duen edonork Erandioko ertzain-etxeko agenteekin harremanetan jar daiteke 946 079 076 telefono zenbakiaren bitartez.
Atzo (astelehena) arratsaldeko ordu biak aldera jazo zen guztia C-6311 errepidean. Txirrindulari bat Bilboko noranzkoan zihoan, konortea galdu eta bizikletatik erori zenean. Biktimari laguntzera abiatu ziren hainbat lekukok dei egin zieten larrialdi zerbitzuei. Bertaratu ziren osasun zerbitzuko kideek gizonezkoa bere onera ekartzeko ahaleginak egin bazituzten ere, zendu egin zen azkenean. Epaile baten aginduz eraman zuten gorpua Bilboko Patologia Auzitegiko Medikuntza Zerbitzura. Erandioko ertzain-etxeko agenteek hartu zituzten kasu honen izapideak bere gain. Baina ezin izan dute oraindik hildakoa identifikatu, ez baitzeraman aldean inolako dokumentaziorik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun