Hori delako eta izango delako gure lurraldea, euskaraz bizi den, euskaraz biziko den herria, euskal hiztunok egingo dugun aberria. Baina asimilazioaren bitartez gure hizkuntza eta nazioari uko egitera behartu nahi gaituztelako mendeetan zehar. Horregatik behar dugu izan burujabe, asimilazio prozesuari aurre egiteko.
Zentzu horretan kokatu behar dugu independentziarako bidea ezinbestez. Herri egiten gaituenari, Euskal Herria egiten duen hizkuntzari eman behar diogu lehentasuna herria askatzeko prozesu osoan. Euskarari lehentasuna emanez eraikiko dugu euskal nazioa, lehentasuna maila juridiko-politikoan eta, nola ez, maila sozialean ere. Baina herri bat bagara herri moduan dagozkigun eskubide eta tresna guztiak geureganatu behar ditugu bidea guk egin ahal izateko, honi guztiari bide emango dion hizkuntza-politika burujabea garatu ahal izateko behar dugu burujabetza.
Eta, horretarako, gutako bakoitzak, hiztun bakoitzak ere, asimilazioa gainditu, eta burujabe izanez, euskarari lehentasuna emanez, euskaraz bizitzeko hautua egin behar du, egin eta eragiteko, autodeterminazio osoz.
Beraz, bidea ez da hasten independentziarekin, eta ez da independentzia egunarekin batera amaituko ere. Baina independentziarik gabe, burujabetzarik gabe nekez berregituratuko dugu Herri Euskalduna; eta aldi berean, herri independente horrek argi beharko du izan Herri Euskalduna dela jomuga.
Egun hori heldu bitarte herri euskalduna berreraikitzeko gure esku dauden aukera guztiak baliatu behar ditugu. Ezin dugu atzerapausorik eman, eta euskara nagusi den eremuak babestu behar ditugu, egin nahi dugunaren erakusleiho ere badirelako. Euskara nagusi izango den eremuak sortu eta eraiki behar ditugu, elkarlanean. Herri moduan dagozkigun eskubideak ere aldarrikatu behar ditugu, eta euskaraz bizi ahal izateko behar dugun Ofizialtasuna aldarrikatu eta eskuratu behar dugu. Maila sozialean emango ditugun urratsek eragingo dituztelako aldaketa politiko eta juridikoak, Herri Euskalduna gaurdanik eraiki dezakegulako, independentzia gaurdanik landu dezakegulako.
Horregatik gara independentistak, euskal hiztunok, euskaldunok erabakia eta independentzia behar dugulako dagokigun bide horretan protagonistak izateko. Guk geuk, gutako bakoitzak, komunitatea osatzen dugula ahaztu gabe, euskaraz bizitzeko hautua eginez eraikiko dugulako herria, horretarako erabakia hartuz, bidea egiteaz gain bidean eraginez.
Igandean, Hendaia eta Irun elkartuko dituen martxan hartuko dugu parte. Komunitate bakarra osatzen dugu, eta mugak gaindituz, independentistak garela, herri euskalduna berreraiki nahi dugula aldarrikatuko dugu.
Guztion esku dagoelako.
Zeuek ere, izan burujabe, eta bizi euskaraz!
Igone Lamarain eta Unai Larreategi EHEko kideak
Igone Lamarain: "Independentistak gara, Herri Euskalduna berreraiki nahi dugulako"
Zer garen galderari "euskaldunak gara" erantzutea ohikoa da gurean. Horrenbeste kantatu eta dantzatu dugun kantuan bezala, "zer gara gu, nor gara gu? Euskaldunak gara gu…" erantzungo diogu galderari. "Herri bat, nazio bat gara" ere, erantzungo diogu galderari. Eta hala da, Euskal Herria osatzen dugu, osatu nahi dugu guztiok. Berezko izaera duen herria berreraiki nahi dugu, berreraikitzen gabiltza. Euskal Herria, euskararen jendartearen herria, euskal komunitatearen nazioa. Hizkuntzak eman diolako izena eta izana gure herriari nahi dugu askatu Herri Euskalduna, Herri Euskalduna askatu behar dugu, euskal jendartea askatu behar dugu. Argazkian, Euskal Herrian Euskarazek (EHE) antolatuta, 2009ko maiatzaren 3an Hizkuntz Eskubideen Eguna ospatu zen Ondarroan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun