Ertzaintzak joan den ostiral (hilak 26) arratsaldean 34 urteko gizon bat atzeman zuen Sopelako gasolindegi batean lapurretan egin zuelakoan eta, atzo arratsaldean, espetxeratu egin zuten epaileak hala aginduta. Egun bat lehenago (hilak 25) izan zen lapurreta. Eusko Jaurlaritzaren Herrizaingo Sailak zabaldutakoaren arabera, aurpegia estalita zeraman gizon batek pistola batekin mehatxatu zuen gasolindegiko langilea eta kutxan zegoen dirua eraman zuen. auto batean alde egin zuen lapurrak. Gertatutakoaren berri izan bezain laster ikerketa bat abiatu zuen Ertzaintzak. Egun hartan bertan, arratsaldez, lapurretan ustez erabilitako ibilgailua eta ustezko egilea aurkitu zituzten Getxon baina ezin izan zuten susmagarria berehala atzeman ez baitzuten lapurretaren egilea zela baieztatzen zuen frogarik. Dena den, hurrengo egunean atxilotu ahal izan zuten, auto bat lapurtu nahian antzeman zutelako Sopelan, polizia iturriek diotenez.
Atxiloketa Sopelako udaltzainek egin zuten, baina aurreko lapurreta ikertzen ari ziren ertzainak hartu zuten kasua bere gain eta, horrela, gasolindegian osteko atxilotuak erabilitako pistola aurkitu zuten; atxilotuaren aita zen armaren jabea, Herrizaingo Sailak dioenez. Horrela lotu ahal izan omen zuten susmagarria gasolindegiko lapurretarekin. Igandean, beharrezko izapideak burutu ostean, atxilotua epailearen esku jarri zuten eta horrek susmagarria berehala espetxeratzeko agindua eman zuen. Gasolindegikoa ez ezik, urtarrilaren amaieran izandako beste bi lapurreta (Getxon egindakoak) ere leporatu dizkiote atxilotuari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun