Uribe Kosta eta Erandioko 30 bat gizon-emakume egin dute elkarretaratzea, gaur arratsaldean, Algortako Telletxe plazan, Bonifacia Ruiz de Arbuloren erailketa salatzeko asmoz. “Emakumeon kontrako indarkeriarik ez!” lelopean, Emakumeon Mundu Martxako Euskal Herriko Plataformaren protokoloari jarraikiz deituta zegoen kontzentrazioa. 91 urteko emakumea hilik agertu zen pasa den astelehenean Agurainen. Andrak hainbat zauri zituen, ustez arma zuriz egindakoak. Herrizaingo Sailak 19 urteko biloba atxilotu zuen ustezko hiltzailea delakoan. Algortako Bilgune Feministak zabaldu duenez, "kasua ez da beste batzuetan bezain argia izan baina indarkeria sexista kasu baten aurrean gaudela baloratu genuen".
Europa Press albiste agentzia espainolak gaur zabaldu duenez, 19 urteko gaztea gaur bertan sartu dute Langraizko espetxean, epaileak horrela aginduta. Hala ere, ustez amona hil zuen gazteak gaitz psikiatrikoa duela eta drogak kontsumitzen dituela zabaldu du Eitb.com agerkariak. Aipatu digitalaren arabera, horrek eragin zezakeen emakumea labankadaz hiltzea. Ikerketaren gertuko iturriek jakitera eman dutenez, gaztea tratamendu psikiatrikoa jasotzen ari zen pertsonalitate arazoak eta arazo sozialak omen zituelako eta, gainera, kokaina kontsumitzen zuenez, portaera gatazkatsua izaten zuen askotan. Dena dela, kasua baieztatuz gero, Ruiz de Arbulo bortxakeria matxistak eraildako urteko laugarren emakumea litzateke. Aurretik, urtarrilaren 17an Elena Cal, Tolosan; otsailaren 8an, Amelia Sanchez, Barakaldon; eta otsailaren 19an, Isabel Velez, Lasarte-Orian, ustez erail zituzten gizonezko bikotekide eta senideek.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.