Hiru mutil atxilotu dituzte Leioako eraikin bateko garajean lapurtzea egotzita
Ertzaintzak hiru gizon atxilotu ditu bart Leioan, indarra erabiliz egindako lapurreta delitua egotzita. Eusko Jaurlaritzaren Herrizaingo Sailak zabaldutakoaren arabera, zerbitzutik kanpo zegoen agente batek eraikin bateko garajean eta trastelekuetan harrapatu ditu, gauerdi aldera. Horrek susmagarriak atxiki egin ditu, patruila heldu arte. Bertara heltzean, ertzainek susmagarriak (16 eta 17 urteko bi adingabe eta 18 urteko gazte bat) identifikatu egin dituzte. Jarraian, agenteek baieztatu dute garajean aparkatutako auto batek (Seat Cordoba) ateetako bat indarrez zabalduta eta barrualdea nahasita zituela, polizia iturriek diotenez. Gainera, beste ibilgailu baten azpian hainbat gauza aurkitu omen dituzte: betaurreko batzuk (zorro eta guzti) eta diru-zorro bat. Ondoren, Seat Cordobaren jabeak baieztatu du objektuok bereak zirela. Trasteleku batek sarraila indarrez zabalduta eta atea irekita ei zituen. Hori guztia dela eta, ertzainek hiru susmagarriak atxilotu dituzte, indarra erabiliz egindako lapurreta delitua egotzita, eta polizia egoitza batera eraman dituzte.
Gertakaria gauerdi aldera jazo da Leioan, Herrizaingo Sailaren arabera, zerbitzutik kanpo zegoen ertzain bat etxebizitzak dituen eraikin bateko garajera jaitsi denean. Bertan, trastelekuak ere badaude. Tokian hiru gizonezko harrapatu ditu eta, garajean zer egiten duten eta nola sartu diren galdetu dienean, gazteek ez dute erantzun koherenterik eman. Egoera horren aurrean, agenteak hiru pertsonak trastelekuen eremuan atxiki egin ditu eta bere emaztearekin harremanetan jarri da, Ertzaintza ohartarazi zezan. Hala, patruila bat bertaratu da segituan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun