Atzeratu egin da 2008ko abenduan atxilotutako uribekostarren kontrako epaiketa

Apirilaren 12 eta 13an ziren egitekoak, Espainiako Auzitegi Nazionalean, Amets Ladislao, Ibai Egurrola, Javier Gutierrez, Marimertxe Alcocer eta Maribel Prietoren kontrako epaiketa. Uribe Kostako Amnistiaren Aldeko Mugimenduak jakinarazi duenez, atzeratu egin da: maiatzaren 25, 26 eta 27an izango da. Hartara, apirilaren 16rako deituta zeuden mobilizazioak bertan-behera utzi dituzte. Amets Ladislao eta Ibai Egurrola algortarrak 2008ko abenduaren 8an atxilotu zituen Irunen Guardia Zibilak, Algortakoa ere den Aitor Artetxe ustezko ETAko kideari ihes egiten lagundu izana egotzita. Beraiekin batera, Jabier Gutierrez "Guti" leioaztarra ere hartu zuten atxilo. Operazio horretan Guardia Zibilak bi egun geroago atxilotutako Marimertxe Alcocer algortarrak eta Maribel Prieto berangoztarrak bezalaxe, "bortizki torturatuak" izan zirela salatu zuten hirurek. Egun, guztiak kalean daude, 18.000 euroko fidantza ordainduta. Fiskalak 7 urteko espetxe zigorra eskatzen du Ladislaorentzat eta 5 urtekoa gainontzeko uribekostarrentzat. Guztiei ETAri laguntza ematea leporatzen die. Argazkian, 2008ko abenduaren 28an, ehunaka lagun, 500 bat antolatzaileen arabera, batu zen eguerdian Algortan, atxilotuek jasandako "tortura basatiak" salatzeko.