Baina amaitu da, oraingoz, brigada mobilak gurekin "aikidoa" praktikatu aurretik gure bertsoei barre egiten zien sasoia. Suhiltzaile gazteek rotaflexaren orriak, gure protestak denbora irabaz zezan, banan-banan frogatu eta alkateak gazteok herritik kanpora bizitzera joan behar genuela buruan sartzeko esaten zigun garaia.
Asteon Txorimalo gaztetxeak lau urte bete ditu. Hunkigarria gaztetxeetan hilabeteurrenak ospatzera ohituta geunden belaunaldiarentzat.
Botereak beldurra dio gazteari, usteldu gabeko gizakiari. Horregatik dabiltza beti hedabideak euren aurka berbaz. Baina ez eduki dudarik, sekula izan dugun gazteriarik onena dugu. Gure herriko gaztetxean lanean dabiltzan gazteak ezagutzeak ilusioz betetzen nau. Nire konplexuen erruz beti kostatu zaidan arren nor den jakin bai baina tratu handirik ez dudanengana hurbiltzea.
Asanbladan lan egiten ikasteak oso militante eraginkorrak sortu ditu. Erabakiak konbentzimenduaren bidez hartzera ohitu dira, eta hori beste mundu bat da. Konprometituak baina umilak, heroikotasuna konstantzia dela ulertzen dutenak, sistemak sortzen digun inpotentziari era sortzailean erantzun, ezberdinean etsairik bilatu ez eta marra igarotzen duenaren aurrean tinkotasunez erantzuten dakitenak.
Jaiotzea jaia da, eta jai guztietan jaiotzen gara berriz. Zorionak, Txorimalo! Distira duen oro lapurtzen duten miken aurkako babesle.
Fredi Paya bertsolari algortarrak pasa den ostiralean "Berria" egunkarian argitaratutako artikulua.
[© Fredi Paya - Berria.info] Aldameneko estatuen indarrak urteotan erresistentzia antierrepresibora mugatu du borroka independentista. Kriminalizaturik, jipoiturik eta bihotza ahoan ibiltzea heroikoa da, baina epe luzera antzutasunaren hazia izan liteke. Horren ondoan beti begitandu zait ezinbestekoa eraikuntza espazioak izatea. Zer ez dugun gura nahiko argi daukagu, baina gura duguna eraikitzeko aukera emango diguten lekuak behar ditugu. Geure buruaren fikzioa den garaipenaren egunetik aurrera egingo genukeena egitera jolastu behar dugu. Jakinik jolastu nahi izatea borroka dela, are gehiago ultraeskuindarrez betetako gure udalerrian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun