“A.E.I.O.U” izenburuko itzalen ikuskizuna ere hartuko du Liburuaren Asteak, 3 eta 6 urte arteko txikiei zuzenduta. Emanaldia Berangoetako kultur etxean izango da, ostegunean (hilak 22), 18:30ean, sarrera dohainik. Agertokia bestelakoa izango da apirilaren 24an eta 25ean. Eguerdiko 12etatik 20:00etara Liburuen Elkartasun Azokaren bigarren edizioa egingo dute udal pilotalekuan. Oraingo honetan, Bielorrusiara laguntza humanitarioa bideratzen duen Acobi elkarteari emango diote bildutako dirua. Besteak beste, material medikoa, botikak, umeentzako oinarrizko elikagaiak, berokiak eta automozio gaiak bidaltzen dituzte erradiazioak nahiko kutsatutako guneetara.
Ipuin kontalariak eta tailerrak
Frontoian, ipuin kontalari saioa egingo dute apirilaren 24an, larunbatarekin, Gizakien Lurra gobernuz kanpoko erakundeak sustatuta. Bestalde, adin guztietarako tailer bereziak 12:00etatik 14:00etara egongo dira zabalik. Toki berean, ludoteka ibiltaria jarriko dute, 1 eta 4 urte arteko umeei bereziki zuzendutako gunea izango dela. Tailerretan kamisetak ere marraztuko dituzte, Berangotik bidaliko duen kargamendu humanitarioarekin batera Timorovoko umezurtz-etxera eramateko asmoz. 18:30ean, berriz, disko festa txikia egingo dute.
Igandean (hilak 25) adin guztietarako tailerrak izango dira, 12:00etatik 14:00etara eta 17:00etatik 20:00etara, frontoian; non 1 eta 4 urte arteko umeei zuzendutako gunea izango den. Goizez, Bielorrusian erradiazioak dituen eraginak ezagutzera emango dira, Elkartasun Pegatinen Tailerraren bitartez. Arratsaldeko zazpietan, “Aissata” izenburuko ipuin kontalari saioa egongo da, Gizakien Lurra elkarteak antolatuta.
Haurren artean irakurzaletasuna sustatzeko liburuak jarriko dituzte Berangoko osasun zentroan
Bizilagun gazteenen artean irakurzaletasuna sustatzea du helburu Berangoko Udalak. Hori dela eta, beste pausu bat eman dute liburuen presentzia ohiko zein gozagarri suerta dakien txikiei. Bide horretan, osasun zentroan liburuen stand bat jartzea barnebiltzen duen kanpaina abian jarri du Kultur Etxeak. 12 urte arteko umeei zuzenduta egongo dira argitalpenak, euskaraz zein espainolez idatzitako liburu erakargarriak egongo direla, osasun zentroko pediatria eremuan. Lau hilabetetan behin berriztatuko dituzte horiek. Bitartean, elkartasuna izango da Berangoko Liburuaren Astearen giltza. Apirilaren 19tik 23ra atari zabalean liburutegia jarri eta tailer bereziak egingo dituzte. Horretaz gain, ludotekak eta haur-liburutegiak euren egitarauak moldatuko dituzte, biak batera jolasak eta tailerrak aurrera ateratzeko, kalean, eguraldia lagun bada. Helburu nagusietako bat izango da, umeek ipuinak idatz eta marraz ditzaten, horiek editatu ondoren, Timovo-ko (Kimovichi, Bielorrusia) umezurtz-etxera bidaltzeko. Kontua da neska-mutil berangoztarrek herrian zehar bizi dituzten abenturen berri eman diezaieten, bielorrusiarrek ezagut ditzaten. Hori dela eta, itzulita helaraziko dizkiete istorioak. Argazkian, umetxo bat liburuak ikuskatzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun