Txorimalo gaztetxearen 4. urteurrenarekin bat eginez abiatu ziren, ostiralean, Sarea josten ekimenaren inguruko jarduerak. Bada, asteburu ederraren ostean, ekitaldiz betetako astea daukagu aurrean. Getxoko euskaldunen arteko harremanak sendotzea xede duen ekimenarekin bat egin duten eragileen erakusketa ibiltaria Aldai patronatuan egongo da ikusgai, ostegunera bitartean. Ostiralean, berriz, Getxo aldeko Malakate parkean paratuko dute. Larunbatean, Algortako Telletxe plazan eta; igandean, Algortako Portu Zaharrean. Ekitaldiei dagokienez, gaur hizkuntza ez sexistaren inguruko hitzaldiaz gozatzeko aukera egon da Aldai patronatuan. Bihar, berriz, bertso saio didaktikoak izango dira, Itzubaltzeta / Romoko Santa Eugeniako kultur etxean, 16:30ean eta 19:00etan. Asteazkenean, berriz, goizeko 8:30ean eta 10:30etan izango dira horiek. Bitartean, asteazken arratsaldean, “Hizkuntza eskubideak” izenburuko hitzaldia emango du Paul Bilbaok, 19:30etan, Aldain. Argazkian, artzainak ardiekin bezala, Getxo udalerriko euskaldunak batzea du helburu Sarea Josten ekimenak.
Aurreko bertso saio didaktikoak galdu dituztenek ostegunean, hilak 15, izango dute horiez gozatzeko aukera, 9:15ean, 17:00etan eta 20:00etan; baina, oraingo honetan, Algortako kultur etxean, Villamonten. Asteburuko egitaraua ez da gutxiagorako izango. Ostiralean, musika jaialdia izango da 17:00etatik aurrera, Algortako Zabala ikastetxean. UKTESTek, berriz, Itzubaltzeta / Romoko Santa Eugeniako kultur etxean eskainiko du hitzaldia, 19:00etan. Eta ordu eta erdi beranduago, kantu-poteoa izango da Itzubaltzetako kaleetan barrena. Larunbatean, egun osoan zehar, familia osorako mendi irteera izango da Gorlizen. Azkenik, igandean, 12:30ean, dantzarien kalejira izango da Algortako Sarrikobaso kalean (Zuhaitza taberna aurrean); eta ordu bete beranduago dantza emanaldia Malakaten. Hain zuzen ere, horretaz guzti horretaz aritu da gaur Lander Solozabal Sarea josteneko sustatzaileetako bat (mp3) Info7 irratiko "Kale gorrian" saioan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun