Terrorismoaren Biktimen Partaidetzarako Euskal Kontseiluko kideetako bat izango da Joseba Markaida Berangoko PSE-EEren zinegotzia, Eusko Jaurlaritzako Herrizaingo Sailak jakinarazi duenez. Azkorriko bizilaguna Zaituko (ETAk Eragindako Jazarpen, Mehatxu eta Erbesteen Biktimen Aldeko Elkartea) presidente gisa izango da bertan. Gainontzeko kideei dagokienez, Administrazio Publikoen aldetik, Rodolfo Ares Herrizaingo sailburuak, Maixabel Lasa Terrorismoaren Biktimei Laguntzeko zuzendariak, Txema Urkijo aipatu zuzendaritzako aholkulari laguntzaileak osatuko dute batzordea. Horiekin batera, Eudelen ordezkariak izango dira Tontxu Rodriguez eta Ricardo Ituarte, Barakaldo eta Santurtziko alkateak, hurrenez hurren. EAEn egoitza edo ordezkaritza duten terrorismoaren biktimen elkarteen aldetik, Markaidaz gain, Coviteko Cristina Cuestak eta ACFSEVTko Javier Correak parte hartuko dute kontseiluan. Isabel Urkijok (Bakearen Aldeko Koordinakundea), berriz, bakearen aldeko elkarteak ordezkatuko ditu. Argazkian, Joseba Markaida.
Terrorismoaren Biktimei Aitorpena eta Erreparazioa egiteari buruzko ekainaren 19ko 4/2008 Legez sortzen da Terrorismoaren Biktimen Partaidetzarako Euskal Kontseilua, eta horren xedea da "terrorismoaren biktimen partaidetza bideratzea haiei eragiten dieten gai guztietan, bai eta administrazio publikoei arlo honetako politika zehatzak abiaraz ditzatela proposatzea ere", Herrizaingo Sailak dioenez. Azaldu dutenez, organo kolegiatu honen eginkizun nagusiak hauek dira: "terrorismoaren biktimen elkarteen eta euskal administrazio publikoen arteko harremanak bideratzea, Eusko Jaurlaritzari laguntzak eta diru-laguntzak banatzeko irizpideak proposatzea, Euskal Autonomia Erkidegoko administrazioak biktimen inguruan ematen dituen xedapenen berri izatea, eta EAEko administrazio publikoei bidezkotzat jotako ekimen eta proposamenak aurkeztea, biktimentzako politika publikoak hobetze aldera".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun