Jardunaldien helburua lankidetza eta ingurumenari buruzko heziketa berezitua eskaintzea da, gobernuz kanpoko erakunde desberdin batzuen esperientzien bidez, hurbilketa teorikoa eta praktikoa eginez. Getxoko Udalak iazko deialdian Unesco Etxeari emandako 9.293 euroko diru-laguntzaren fruitua dira. Imanol Landa alkateak, gaur, jardunaldien aurkezpenean nabarmendu duenez, Getxoko Udalak "apustu argia" egiten du Lankidetzako Garapenaren alde, "bai aurrekontuetan, bai horren inguruko sentsibilizazioa udalerrian zabaltzeko". Ildo horretan, alkatearen ustez (mp3), “lankidetzako politika positiboa egin ahal izateko ezinbestekoa da inguruneko irizpideak eta iraunkortasuna lankidetzari lotzea. Horregatik, oso interesgarritzat jotzen dugu Unesco Etxeak gai horiek lantzeko egindako proposamena”.
Hitzaldiak
Hitzaldien bitartez, hainbat kontzeptu jorratuko dituzte, tartean, iraunkortasuna eta giza garapena, mundu mailako ingurumen-erronkak, erantzukizun soziala korporatiboa eta iraunkortasunerako teknologiak. Asteleheneko gaia "Ingurumenaren eta garapenerako nazioarteko lankidetzaren hastapenak" izango da; asteartekoa, "Ura eta garapena"; asteazkenekoa, "Ingurumena, erantzukizun sozial korporatiboa eta generoa"; eta ostegunekoa, "Aldaketa klimatikoa, garapenerako mehatxu". Mikel Mancisidor Unesco Etxea GKEaren zuzendariak nabarmendu duenez, "datozen urteei begirako aukera" bat izan behar da aldaketa klimatikoa; “egokitzapenera eta murriztera zuzenduko diren baliabideak garapenerako aukera izan behar direlako, bai Hegoaldeko herrialdeetan, bai Iparraldekoetan“.
Ingurumena eta lankidetzaren inguruko hitzaldiak egingo dituzte datorren astean Algortan
"Ingurumenaren eta lankidetzaren esparruko alderdi berritzaileak” izenburuko jardunaldiak antolatu ditu apirilaren 19tik 22ra Getxoko Udalak, Unesco Etxea GKErekin elkarlanean. Saioak Algortako kultur etxean izango dira, Villamonten. Esan bezala, iraupena lau egunekoa izango da eta nahi beste hitzaldietara joan ahal izango dira interesatuak. Ordutegia 9:00etatik 14:00etara izango da, ostegunean izan ezik. Egun horretan arratsaldeko saioa ere izango da: 18:00etatik aurrera, “Tukki, la huella ambiental” izenburuko filma proiektatuko dute. Bukatutakoan, mahai-ingurua izango da Celia Babero (IPADE), Rosa Castizo (Garapenerako Politiken Zuzendaritza eta Atzerri Arazoetarako eta Lankidetza Ministerioa) eta Iñaki Antiguedad (EHU) hizlarien eskutik. Jardunaldiak Gobernuz Kanpoko Erakundeetako teknikariei eta boluntarioei daude zuzenduta, baita Getxoko auzokideei ere. Izen-ematea egiteko eta informazio gehiago eskatzeko honako hauetara jo dezakete interesatuek: koopera[abildua]unescoeh.org eta 944 276 432. Argazkian, Imanol Landa alkatea eta Mikel Mancisidor Unesco Etxea GKEaren zuzendaria, gaurko prentsaurrekoan / © Getxo.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun