Bizilagunen ustez, "ezer gutxi egiten du" Aldapa hobetzeko Getxoko Udalak. "Beharrezkoak diren hainbat zerbitzu ere ez ditugu, haurtzaindegia kasu. Algorta goialderaino joan behar izaten gara horiez baliatzeko. Bestalde, Getxo Antzokia bezalako obra erraldoietan murgilduta dabil Udala. Bitartean, ezer gutxi axola zaizkio Aldapa, Zubilleta...", adierazi du Fernandok.
Aparkalekuak
Auzotarrak udaletxeraino hurbildu aurretik, baina, Aldaparaino gerturatu dira Getxoko PPko zinegotziak (ikusi argazkiak). Martxoa bukaeran Aldapa parkea eta bere inguruak berritzeko proiektua aurkeztu zuten Imanol Landa alkateak eta Joseba Arregi Hirigintza zinegotziak. Horri helduta, "Itzubaltzeta / Romoko Gobelaurre edo Txabarri Zuazo edo Neguriko Gernika parkeekin bezala, lehendabizi bere proiektua landu eta, eginda dagoenean auzotarrei aurkeztea" egotzi dio Landari Marisa Arrue bozeramaile popularrak. Hartara, apirilaren 30eko osoko bilkurarako mozioa aurkeztuko dute PPkoek, bizilagunei "aparkalekuen beharraz" galde diezaien. Arrueren arabera, "aurretik galdetu behar zaie bizilagunei. Ez bakarrik plazaren diseinuari buruz; baita lur azpiko aparkalekua jartzeaz ere. Are beharrezkoagoa beilatokia egiten badute". Gauzak horrela, auzotarren artean galdeketa egitea planteatzen dute.
"Beilatokirik ez!" aldarria udaletxeko ateetaraino eraman dute gaurkoan Algortako Aldapa inguruko bizilagunek. Luis Fernando auzo-elkarteko kidearen arabera, aipatu azpiegitura "inposatzen" ari zaie Getxoko Udala. "Legezkoa dela diote eta, agian, horrela izango da. Baina, beste tokietan, industrialdeetan edo kanposantuetan jarri ohi dituzte beilatokiak. Zentzuzkoena da hori". Ildo horretan, proiektuaren gaineko informaziorik ez zaiela heldu salatu dute auzokideek. "Hondeatzaileak Azaldegui okintza-lantegia zena botatzera sartu direnean konturatu gara", aipatu dutenez. Horrenbestez, udal hauteskundeak datorren urtean direla ohartarazi diote Imanol Landa alkateari Aldapakoek. "Horrelako jarrerek egungo Udal Gobernuaren kontrako gaztigu-botoa eragin dezakete", Fernandoren ustez. Auzo-elkarteko kideak salatu duenez, gaur bigarrenez kendu dizkiete faroletan jarritako kartelak. Bitartean, zerbitzu juridikoen esku jarri dute dokumentazio guztia bizilagunek, Udalaren kontrako ekinbide legalik abia daitekeen azter dezaten. Argazkian, 20 bat auzokide elkartu dira udaletxe aurrean. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun