Asteburu honetan ere aurrera jarraituko dute Getxo udalerriko Sarea josten ekimen euskaltzalearen jarduerek. Izan ere, aste bete-betearen ostean euskaraz jositako asteburu ederra ekarriko digute Algorta, Itzubaltzeta / Romo eta Getxora. Ekitaldiei dagokienez, gaur musika jaialdia izan da arratsaldean Algortako Zabala ikastetxean. UKTESTek, berriz, Itzubaltzeta / Romoko Santa Eugeniako kultur etxean eskaini du hitzaldia, 19:00etan. Eta ordu eta erdi beranduago, kantu-poteoa izango da Itzubaltzetako kaleetan barrena. Larunbatean, egun osoan zehar, familia osorako mendi irteera izango da Gorlizen. Azkenik, igandean, 12:30ean, dantzarien kalejira izango da Algortako Sarrikobaso kalean (Zuhaitza taberna aurrean); eta ordu bete beranduago dantza emanaldia Malakaten. Hain zuzen ere, horretaz guzti horretaz aritu zen aurreko egunean Lander Solozabal Sarea josteneko sustatzaileetako bat (mp3) Info7 irratiko "Kale gorrian" saioan. Argazkian, Jose Antonio Agirre euskaltegiko ikasleak Sarea josten ekimeneko erakusketari so.
Bestalde, Getxoko euskaldunen arteko harremanak sendotzea xede duen ekimenarekin bat egin duten eragileen erakusketa ibiltaria Getxo aldeko Malakate parkean paratu dute gaur. Bihar, Larunbatarekin, Algortako Telletxe plazara eta; igandean, Algortako Portu Zaharrera eramango dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun