Fernando Grande Marlaska Espainiako Auzitegi Nazionaleko epaileak aske utzi ditu gaur Erramun Landa Leioa eta Erandioko campuseko pintura irakaslea eta Jose Luis Gallastegi, bere egoitzan hartu ostean. 15:30ak aldera atera dira auzitegitik. Guardia Zibilak asteazkenean atxilotu zituen, baita beste zortzi lagun ere: horien artean, Arantza Zulueta Lemoizko bizilaguna eta, besteak beste, eskualdeko hainbat presoren abokatua; eta Saioa Agirre Sopelako Zipiriñe ikastetxeko andereño zornotzarra. Efe berri agentziak dioenez, epailea 11:45ean hasi da haiek hartzen; Luis Barroso fiskala bertan da. Aldiz, ez daude han atxilotuen konfiantzako abokatuak, ez baitiete egoten utzi; gainera, Grande Marlaskaren egoitza dagoen solairutik bidali egin dituzte. Atxilotuak ofizioko abokatuekin daude. Epaileak Naia Zuriarrain, Jon Enparantza, Arantza Zulueta eta Iker Sarriegi hartu ditu aurrenik, banan-banan, baina ez du oraindik erabakirik jakinarazi. Auzitegiko iturriek diote fiskalak haien kartzelatzea eskatuko duela; Landa eta Gallastegiren kasuan aske uzteko galdegin du. Beste laurak arratsaldean eramango dituzte epailearengana, 17:00ak aldera. Lapurdin atzemandako David Pla ere orduotan eramango dute epailearen aurrera. Argazkian, ostegunean salatu zuten Erramun Landaren eta besteen atxiloketa Leioako campusean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun