Aste Santuan jasotako emaitzen balantze "oso positiboa" egin dute Sopelako turismo bulegoek. Epe horretan, arreta ordutegia zabaldu egin zuten zerbitzua handitzeko. "Bisiten kopurua 131 pertsonakoa izan da aurten; 30 pertsona izan ziren iaz. Hori %500eko igoera da", diote udal arduradunek. Gehien bat, adinez nagusi diren pertsonek egin dute bisita (91), gazte jendearen (67), haurren (14) eta jubilatuen (9) aurretik, hurrenez hurren. Sexuen artean ez da alde nabarmenik egon: 93 gizonezko eta 88 emakumezko. Jatorriari dagokionez, 78 pertsona etorri dira Estatu espainoletik, 53 Bizkaitik, 29 udalerritik bertatik eta 21 Espainiako Estatutik kanpotik. Pertsona horiek herriko eta inguruetako mapak, intereseko tokiei buruzko eta hondartzen gaineko informazioa eta abar eskatu dituzte. Argazkian, Sopelako turismo bulegoa / © Joseba Zubiaur - Sopelako Udala.
Bestalde, Kataluniako Nazioarteko Turismo Aretoan (SITC) parte hartu zuen, apirilaren 15etik 18ra, Bartzelonan, Sopelako Turismo Bulegoak. Bizkaia Euskal Kostaldearen eskutik joan zen eta Bizkaiko erakusmahaian egon zen. Azokak iraun zituen egunetan Sopelako turismo gidak banatu ziren; baita udalerriko, ostatu eta enpresei buruzko informazioa ere. "Euskal Herriak Kataluniako bisitari ugari hartzen ditu, eta ondorioz, esperientzia oso positiboa izan da", aipatu dute udal iturriek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun