Algortako Musika Eskola jartzeko, Getxolanen eraikina erabiltzea eskatuko du apirilaren 30eko udal batzarrean, mozio bidez, Getxoko PPk. Areetako azoka zegoen tokian altxatuko duten enpresa elkartegira aldatuko dute enplegu sustapenerako zentroaren egoitza, Marisa Arrue bozeramaile popularrak adierazitakoaren arabera. Gauzak horrela, musika eskola berria San Martin kaleko udal eraikinean jarri dezatela galdegin dute PPkoek. "Getxo Antzokirako proiektatutako bigarren blokea ez lukete eraiki behar izango horrela, kultur zentro berria etxebizitzetatik urrunago egotea eta eremu irekiagoa egitea ahalbidetuz", aipatu du Arruek. Beste hainbat arrazoi ere eman ditu Getxoko PPren bozeramaileak. Bere ustez, "inbertsioa askoz txikiagoa izango litzateke, dagoeneko Getxolanen egungo egoitza udal eraikina badelako eta berririk eraiki behar ez delako. Bestalde, berdeguneez inguratuta dago". Argazkian, Getxoko PPko hainbat zinegotzi gaur Getxolanen aurrean.
Orain hilabete batzuk, Algortako Musika Eskola Telefonica enpresak Basagoiti Etorbidean daukan eraikinean jartzea proposatu zuen Getxoko PPk. Hala ere, Udalaren ezezkoa izan zuten popularrek. Gaurkoan ere horren kontura "gezurra esatea" egotzi dio Imanol Landa alkateari Arruek: "telefonia enpresako arduradunekin izandako batzarretan argi geratu zen eraikina saltzeko asmoa bazeukatela", aipatu duenez. Hala ere, udal agintariak egin duen "bigarren bihurrikeria" baten berri eman du gaurkoak tokiko popularren bozeramaileak. Arruek salatutakoaren arabera, "Getxo Antzokiko proiektuaren egikaritza sei fasetan (hondeaketa lanak, parkinga, lur-azpiko estruktura, lur-gainekoa, instalazioak eta akabera; eta urbanizazioa) banatu du Landa jaunak, oposizioko taldeon kontrola saihesteko asmoz. Horrela ez du proiektuaren esleipena udal batzarrera aurkeztu beharko".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun