Hileta autoak auzo erdigunetik igaro ez daitezen, Ollarretxe kaletik beilatokira sartzeko arrapala prestatuko dute. Sarbide berri horrek gain kostua izango du enpresarentzat. Hori bideragarri egiteko Ollarretxeko 8. zenbakiko Jabeen Erkidegoko saneamendu sarea aldatu beharko dute. Halaber, Bizkaiko Foru Aldundiarena den Ollarretxe kaleko errepide tarte hori berari emateko gestioak arinduko ditu Udalak. Horretaz gain, enpresak beilatokiaren inguruarekin bat datorren proposamen estetikoa aurkeztu du eta berea den eraikinaren ingurua egokitzeko konpromisoa ere hartu du.
Errausketa-laberik ez
Era berean, alkateak adierazi duenez, HAPO aldatzeko proposamena eramango du udal batzarrera, maiatzean, Imanol Landa buru duen Gobernu Taldeak, hiri-lurzoruan errausketa-labeak galarazteko. Neurri horrekin Aldapako beilatokia inolaz ere errausketa-labe bihur ez dadin bermatuko da. “Horrela”, aipatu du udal agintariak, “auzokideen aurrean neure gain hartutako konpromisoetatik beste bat betetzen dut”.
Algortako Aldapa inguruan beilatokia jarriko duen enpresak instalazio horretarako sarbidea aldatuko du, hileta autoak auzoko erdigunea zeharkatzea saihesteko asmoz, Getxoko Udalak adierazi duenez. “Udal teknikariekin batera izan gara lanean, auzokideen ordezkariekin izandako bi batzarretan hartutako konpromisoei erantzun egokia emate aldera. Horiek bete ez ezik, are garrantzitsuagoa dena, enpresak auzotarren eskariak bereganatzea ere lortu dugula uste dut”, esan du gaurko prentsaurrekoan Imanol Landa alkateak. Azken bilera hori apirilaren 9an izan zen, tokiko agintariaren arabera. Hala eta guztiz ere, hilaren 16an "Beilatokirik ez!" aldarria udaletxeko ateetaraino eraman zuten bizilagunek. Azken eskari hori, ordea, ez dute beteko, Landaren hitzetan, "eskatutako lizentzia ukatzerik ez dagoelako". Alkateak azaldutakoaren arabera, "lizentziak araututako baimenak dira. Hau da, legaltasun urbanistikoak jarduera baimentzen badu eman egin behar da, nahi izan edo nahi ez izan". Argazkian, beilatokiaren kontrako kartela Azaldegui okintza-lantegia zenaren aurrean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun