Azken asteburuan ere aurrez aurrekoekin arazoak izan direla salatu zuen atzo Etxerat euskal preso politikoen senideen elkarteak. Uribe Kostako Amnistiaren Aldeko Mugimenduak azpimarratu duenez, Jagoba Terrones berangoztarra bisita intimoa egin ezinik gelditu zen Castello (Herrialde Katalanak) aldeko Albocaser espetxean. "Bezperan, aurrez aurreko familiarra izan zuen arren, intimoa egiterako orduan araketa egiteko agindua zegoela esan zioten senideari. Madrildik etorritako zerrenda baten arabera, miatu behar zuten", azaldu du errepresioaren kontrako erakundeak. Bitartean, Salamanca (Leon, Espainia) aldeko Topas espetxean, azkeneko bi egunetan itxialdian egon dira. AAMren arabera, "astelehenean kideek jasotako jipoiak salatzeko eta atzo Zigor Goikoetxea aurrez aurrekoa galdu izanagatik". Salatu dutenez, preso getxoztarrak aurrez aurrekoa galdu zuen, "araketa umiliagarrien saiakerak direla-eta". Argazkian, 2009ko urriaren 16an espetxeratu zuten Jagoba Terrones.
"Bestela ere, Espainiako gobernuak 2009ko urritik aurrera presoen familiarrak funtzionarioek ukituta arakatzeko erabakia hartu zuenetik oso modu desberdinetara aplikatu zaie kartzela bateko edo besteko familiarrei, eta kartzela bakoitzeko ezaugarriak kontutan izanik modu batera edo bestera erantzun zaio neurri horri. Hartara, neurri horrek bestelako ondorioak izan ditu, eta oraindik ere baditu, kartzela batean edo bestean izanda", adierazi du Uribe Kostako Amnistiaren Aldeko Mugimenduak. Horrekin lotuta, Algortako presoen egoeraren berri eman dute Etengaben.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun