1990ean bakarlari onenaren saria irabazi zuen "Concours de la defense" lehiaketan. Hurrengo urtean Henri Texier kontrabaxu-jole famatuarekin "Azur Quartet" disko arrakastatsua grabatu eta Michel Portal klarinete-jolearekin elkarlanean aritzeko aukera eman zion horrek. Artista horiekin eskutik, Bojan Zk bere musika-lengoaia garatu zuen, Balkanetako eragin folkloriko ugari dituena. 1993an debuteko diskoa grabatu zuen bere lehenengo laukotearekin eta, handik bi urtera, New Yorkera joan zen bere bigarren lana prestatzeko: "Yopla!". 1999an kultura anitzeko doinuak uztartzen dituen "Koreni!" proiektua gauzatu zuen zortzi herritako musikarien laguntzaz: Karim Ziad perkusionista aljeriarra, Ney Kudsi Erguner maisu turkiarra, Vlatko Stefanovski rock gitarra-jole mazedoniarra, Belgradoko hiru artista eta Predrag Revisin eta Vojin Draskoci baxu-joleak.
Zenbait urtez diskorik grabatu barik egon ondoren, "Solobsession" lana kaleratu zuen 2001ean, nazioartean ospe handia lortuz. Konposizio bikainez beterik, Bojan Z estilo paregabeko piano-jolea zela baieztatu zuen diskoak. Areetako kontzertuan "Tetraband" bere azken lanaren kantak aurkeztuko ditu. Iaz grabatu zuen Josh Roseman tronboi-jolearen, Ruth Soller baxu-jolearen eta Seb Rochford bateria-jolearen laguntzaz.
Sariak
Bere jardueran, sari ugari lortu ditu Bojan Zulfikarpasicek. Horien artean honako hauek aipatu behar dira: 2002an, Frantziako gobernuaren "Chevalier de L'Ordre des Arts et des Letres" titulua, eta Academie de Jazzaren urteko jazz musikari onenari emandako Django saria. 2005ean Europako Jazz Saria (Hans Koller Prize) lortu zuen Europako Jazz Artista Onenaren mailan.
Ohi denez, aurten ere omenaldia egingo dio Getxoko Jazzaldiak Pio Lindegaardi, jaialdi getxoztarraren laguntzaile nagusienetariko bat izan zenari, alegia. Hori dela eta, larunbatean, apirilak 24, egungo jazz eszenako piano-jole ospetsuenetariko bat Bojan Zulfikarpasic (Bojan Z) artista serbiarraren Tetraband taldeak jardungo du Areetako Andres Isasi Musika Eskolan, 20:00etatik aurrera. Sarrera 12 eurotan izango da. Bojan Z musikazaleen familia baten baitan jaio zen 1968an. Bost urte baino ez zituela hasi zen pianoa jotzen eta, nerabezaroan, bere musika-hezkuntza eta zenbait talderekin eginiko kontzertu jarduera uztartu zituen. Oso gaztea zela Jugoslaviako eszenan gailendu zen eta 1989an bere herriko jazz musikari gazte onenari emandako saria eskuratu zuen. 80eko hamarkada erdialdean Parisera joan zen, Balkanetako musikaren aberastasunaz jabetuta. Frantziako artista nagusienetariko bat bilakatu zen handik gutxira eta CIM-en, artista gazteengan eragin handia duen eskolan, bizi eta lan egiten hasi zen. Garai horretan, besteak beste, Noel Akchote, Julien Lourau eta Magic Malik artistekin elkarlanean jardun zuen. Argazkian, Bojan Z pianista serbiarra / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun