Urbanizazio lan horiek direla-eta, aldaketak izango dira auzoko ohiko joan-etorrietan. Izan ere, kaleetako batzuen ohiko norabidea aldatu egingo da, lanek aurrera egin ahala. Horregatik, joan den astetik debekatuta dago Artatza kaletik abiatuta San Bartolome kalean gora egitea. Bestalde, Joaquin Achucarro eta San Bartolome kaleen artean (elizaren parean), Basañese kaleko zatian, trafikoa moztu dute. Bestalde, ibilgailuen eta oinezkoen zirkulazioari eragingo dioten neurri horien ondorioz, Peruri auzora, Luberri multzora eta San Bartolome Ikastetxera sartzeko bideak berrantolatu beharko dira eta honela geldituko dira:
- Peruri auzora sartzea: San Bartolomeko sarbidea itxita (auzotik irteteko erabili ahalko da), Kurkudirako igoeratik eta Artatzagana kaletik (Aldekoenako biribilgunearen bidez) sartu ahalko da.
- Luberrira sartzea: San Bartolome kaletik sartuko dira Peruri auzotik datozenak; Artatza kaletik sartzeko, Basañese kaletik Joaquin Achucarro kalera joan beharko da eta hortik jaitsiko da, Luberrira sartzeko.
- Luberritik irtetea: San Bartolome kaletik edo Joaquin Achucarro kaletik irten ahalko da, baina, edonola ere, Artatza kalera irtengo da.
- Oinezkoak San Bartolome Ikastetxera sartzea: oinezkoek San Bartolome baseliza inguratu beharko dute ikastetxera sartzeko. Autobusentzat behin-behineko geralekua jarriko da Joaquin Achucarro kalearen hasieran, orain zeharkako aparkalekuak dauden lekuan. Ikasleak ikastetxera ekartzen dituzten ibilgailuek Basañese kalean aparkatu beharko dute nahitaez.
Dagoeneko hasi dira Leioako San Bartolome auzoa urbanizatzeko lanak. Udalak adierazi duenez, obrak Artatza kaletik hasi (Telleriako biribilgunearen parean) eta herri ikastetxearen, baselizaren eta kultur gunearen eremuraino zabalduko dira; baita Achucarro kaletik San Bartolome kaleraino bertaraino ere. Ekintza horrek 5 milioi euro inguruko kostua izango du. Lanon bitartez, honakoak egin nahi dituzte: San Bartolome kalea erabat berritu (lurrazpiko zerbitzuak, asfaltoa, espaloia eta argiak) eta baterian aparkatzeko aparkalekua egin; Achucarro kalearen amaierako tartea erregularizatu, zuzkidura horiek ere atonduz; San Bartolome plazaren gaur eguneko azalera bikoiztu; ohiko probalekua berreskuratu; eta Altzagaondo parkea sortu (auzo guztian zehar ibili ahal izateko, Zarragabarrena, Altzagaondo eta San Bartolome parkeetatik). Urbanizazio lanak egiten diren bitartean, 190 etxebizitza inguru (horietako 30 babes ofizialeko etxebizitzak izango dira) eraikitzeko lizentziak ere emango dira. Era berean, Elizak bere kargu hartuko du otoitz leku berri baten eraikitzea, gaur egungo tenplua ordezkatzeko asmoz. Argazkian, San Bartolome obretan / © Leioa.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun