Kooperatiba horretan parte hartzeko, aurrekoan bezala, derrigorrezkoa da enpresa kudeatzailean izena ematea; Sabino Arana etorbideko 12. zenbakian (944 803 148). Astelehenetik ostegunera, 9:00etatik 13:00etara eta 16:00etatik 19:00etara, edota ostiraletan 8:00etatik 14:00etara izango da horretarako aukera. Errolda-ziurtagiria eta DNIaren kopia aurkeztea nahitaezko betekizuna izango da. Eusko Jaurlaritzaren araudia bete beharko dute interesdunek, hots, etxebizitza propiorik ez izatea eta finkatutako diru-sarrera artean kokatuta egotea. Horretaz gain, azkenengo lau urteetan gutxienez bi urte Leioan erroldatuta egon izana beharrezkoa da.
Diru-sarrerak
Bestalde, parte hartzaileen diru-sarreren eskakizunak honakoak izango dira: erregimen orokorreko UETen onuradunen gehienezko diru-sarrera haztatuak, Euskal Autonomia Erkidegoko araudian jasotakoarekin bat kalkulaturik, ezin dira 1,5 indizea baino handiagoak izan, erregimen orokorreko babes ofizialeko etxebizitzak eskuratzeko indarrean diren gehienezko diru-sarrerei dagokienez, edo aldaketarik egonez gero, indarrean dagoen araudian ezarritakoaren araberakoa. UETen onuradunen gutxieneko diru-sarrera haztatuak ezin dira 12.000 euro baino gutxiagokoak izan, aurreko atalean aipatutako araudian xedatutakoari jarraiki neurtuak.
Bi astearte barru, maiatzaren 4an, izango da Ondizko babes ofizialeko etxebizitzetako bat eskuratzeko izena eman duten lagunen arteko zozketa publikoa, Sakoneta kiroldegian bertan. Bestalde, zonalde berean egingo diren etxe tasatuetako kooperatiban inskribatzeko epea hile horren erdialdean zabalduko dute. "Dagoeneko udal tramiteak eginda daude. Beraz, aste pare bat barru irekiko da epea 57 etxe (garaje eta trasteleku) tasatuen kooperatiban izena emateko", tokiko iturriek zehaztu dutenez. Pisu horietako hiru mugikortasun urri iraunkorra duten ezgaituentzat izango dira. Bestalde, Leioako Udalak bi etxebizitza gordeko ditu ostatua eman behar den kasuetarako. Etxe tasatu horien salneurria, babes ofizialeko etxeen eta prezio librekoen artean ibiliko da. "Gehienezko prezioa behin-behineko udal-kalifikazioa eskuratzen den unean indarrean dagoen erregimen orokorreko BOEen gehienezko prezioari 1,7 indizea aplikatzearen ondoriozkoa izango da; edo, aldaketarik egonez gero, indarrean dagoen araudian ezarritakoaren araberakoa", udal arduradunek azaldu dutenez. Argazkian, 2009ko urtarrilaren 26an banatu zituzten Javier Madrazo Eusko Jaurlaritzaren aurreko Etxebizitza sailburuak eta Eneko Arruebarrena Leioako alkateak, Lamiako auzoko errentazko etxebizitza sozialen giltzak / © Leioa.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun