Apirileko udal batzarrean eztabaidatuko dute Getxo Antzokia eta Romo Kultur Etxearen proiektuen onespena
Ostegun honetan, hilak 29, Getxo Antzokia eta Romo Kultur Etxe berriaren oinarrizko proiektuak onetsi edo ez erabakiko da ohiko udal batzarrean. Imanol Landa alkateak gaur goizean gogoratu duenez, "Getxoren modernizatze prozesuan funtsezko bi proposamen dira". Getxo Antzokia eta ondoan jarriko duten Algortako Musika Eskolari dagokienez, etzi erabakiko dute antzokiaren bolumetria, musika eskolarena, muga eta bi instalazioetako areto eta gelen finkatzea, besteak beste. Lehenengoak, 22,5 metroko garaiera izango du guztira. Musika eskolak, berriz, behe solairua, beste bi altuera eta teilatupea edukiko ditu. Landak aipatu du gaur egun arte proiektu hori bost alditan eraman dutela Udalbatzara, erabakiren bat hartzeko; eta guztietan, "gehiengoaren babesa lortu dutela". Romo Kultur Etxeari dagokionez, "sozializazio prozesu handi bat egin eta auzotarrek onartu ostean", oinarrizko proiektua onartu ala ez erabakiko dute. Horrek 4.000 metro koadroko eremua izango du, liburutegi, entsegu lokalak, auditorium eta abarretan banatuta. Guzti hori aurrera eramateko erabiliko den tokia, Itzubaltzetako Santa Eugenia plazako egungo eraikina udazken aldera eraitsita lortuko dute. Argazkian, Joseba Arregi eta Imanol Landa gaur Getxolanen emandako prentsaurrekoan.
Bestaldetik, alkateak baztertu egin du PPk udalbatzara eramango duen proposamena. Egungo Ekonomi Sustapenerako eta Enplegu Zerbitzuak (Getxolan) hartzen duen Algortako San Martin kaleko eraikinean musika eskola ipintzearena, alegia. Landak adierazi du proposamen hori duela urte batzuk atzera bota zutela, orduan, orain 20 urte, "zentro ofizial bat hartzeko araudiak eskatzen zituen baldintzak ez baitzituen betetzen eraikinak". Gaur egun, "are bideraezinagoa da", alkatearen hitzetan. "Izan ere, egungo musika eskolak duen eskariak 26 gune dituen zentroa eskatzen du, 779 metro koadroko azalera ingurukoa. Eta San Martinekoak, berriz, 219 metro koadro baino ez ditu, 12 espazio hartzeko modukoa", azaldu du Landak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun