Maiatzaren 1etik urriaren 31ra bitartean, Getxo Dinosauro Parkea erakusketa ikusi ahal izango da Areetako Txurruka moilan. Kretazikoan eta Jurasikoan, hau da, dinosauroen urrezko garaian bizi ziren izaki ikusgarrienetako batzuen tamaina errealeko 16 erreprodukzioz osatuta dago mostra. Imanol Landa alkateak toki horretan adierazi duenez, “izugarrizko erakusketa hau Udalaren beste apustu bat da Getxora bisitariak erakartzeko eta, era horretan, merkataritza eta ostalaritzaren jarduera sustatzeko; hala nola, udalerriko eskaintza turistikoa aberasteko”. Ekimena tokiko erakundeak eta sektore pribatuko ordezkariek osatutako Merkataritza Mahaian adostu zuten eta, helburua da, "bisitariek zein getxoztarrek gastua udalerrian egitea". Marisa Arrue Getxoko PPren bozeramaileak orain astebete salatu zuen Txurruka moila "uda osoan itxita" egongo zela eta "bertara sartzeko ordaindu" behar izango zela. Getxo Dinosauro Parkea ikusteko 3 euro pagatu beharko dituzte nagusiek, 2 euro umeek, eta 1,50 euro pertsonako 20 kide baino gehiagoko taldeek. Hala ere, "Getxoberri" udal astekariari esker dohain joan ahal izango du nahi duenak, Landak aipatu duenez. Argazkian, tiranosauro bat Areetan / © Getxo.net. Argazki gehiago ikusteko sakatu hemen.
“Hurrengo alean gonbidapen bat argitaratuko da, bi pertsonentzat, parkeko kanpoaldean dagoen txarteldegian sarrera biren truke aldatu ahal izango dena. "Getxoberri" agerkariak 30.000 ale kaleratzen dituenez, 60.000 gonbidapen banatuko dira", azaldu du alkateak. "Esperientzia ondo irteten bada”, esan du Landak, “agian, etorkizunean, gauza bera errepikatuko dugu”. Getxo Dinosauro Parkea erakusketa aitzindaria da. Piezek itxura izugarri errealak eta xehetasun handiko egiturak dituzte. Azken horiek pigmentu naturalez eskuz margotuta lortu dira. Teknologia berriak eta eskulangintza teknikak uztarturik, Europako dinosauro erreprodukzioen bilduma nagusienetako bat lortu da. "Helduentzako zein haurrentzako jarduera ezin hobea da erakusketa, dinosauroek eragiten duten lilurak ez du adinik eta. Halaber, ekimenaren balio ludikoari eta didaktikoari esker, Dinosauro Parkea oso erakargarria da, ez bakarrik zaleentzako, baita dinosauroen mundua lehenengo aldiz ezagutu nahi dutenentzako ere", udal arduradunen ustez. Erakusketa zabalik egongo da maiatzaren 1etik urriaren 31ra arte, 11:00etatik 14:00ak arte eta 14:00etatik 20:00ak arte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun