Igande honetan, maiatzak 2, 25 urte beteko ditu Punta Galea Txirrindulari Elkarteak antolatu ohi duen martxa zikloturistak. 2005az geroztik Javier Otxoa Klasika izena ere hartzen du lasterketak. Txirrindulari paraolinpiko berangoztarrak ere parte hartu du noizbait. Horrenbestez, ohikoa denez, goizeko 9etan abiatuko dira Algortako Fadura kiroldegiko belodromotik bizikleta zaleak. Lasterketa Unbera abiatuko da, Butroi, Maruri, Larrauri, Mungia, Olabarri, Errigoiti, Gernika, Urretxua zeharkatu eta Gerekizetik berriro bueltatzeko, 121 eta 95 kilometroko bi ibilbideak, luzeena eta laburrena, osatu arte. Martxa amaitzen duten guztiei oparia emango zaie, probaren oroigarri gisa, zenbakia eman eta gero. Argazkian, Javier Otxoa.
Federazioaren lizentzia ez duten zikloturistek lasterketan parte hartu ahal izango dute “federazioaren eguneko lizentzia” aldez aurretik eskuratuta. Izena ematerakoan lortu ahal izango da. Igandean bertan egin ahal izango da hori: goizeko 8etatik aurrera egongo da izena emateko aukera, Fadurako pilotalekuan. Larunbatean ere kiroldegiko egoitza nagusira hurbiltzerik badago, 17:00etatik 20:00etara. Gehienez 600 partaide onartuko dituzte. Buruko babesa, kaskoa, jantzi beharko dute txirrindulariek eta arau hori betetzen ez duenak lasterketatik kanpo geratuko da, antolakuntzatik aipatu dutenez. Izen-emate kuotari dagokionez, 15 eurokoa da federatuentzat (11 euro aurrez izena eman dutenek) eta 25 eurokoa federatu ez direnentzat (23 euro aurrez izena eman dutenek).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun