Getxoko Udalak 45.124 euro emango ditu Romo herri ikastetxeko euri-kanalizazio lanak egiteko zein patioetako bat asfaltatzeko. Begoña Ezkurra Hezkuntza zinegotziak adierazi duenez, “egungo krisiak eraginda, diru-sarrera gutxiago izango ditu Udalak. Hortaz, murrizketak izango dira aurrekontuetan. Hala ere, garrantzitsuak eta beharrezkoak jotzen ditugun inbertsioak egiteko ahaleginetan jarraitzen dugu". "Getxoko Udalak Euskal Eskola Publikoaren alde egiten duen beste apustu bat da hau”, gaineratu duenez. Udalerrian 8 herri ikastetxe daude eta Haur Hezkuntzako bi. “Iaz”, azaldu du Ezkurrak, “Udalak 136.634,50 euro inbertitu zituen konponketa eta hobetzeko lanetan eta 150.567 euro instalazioak atontzeko eta berritzeko. Hori ikastetxetan egiten den inbertsioaren %40a da. Ez ditugu zenbatuta, ia egunero, udal brigadek arazo elektrikoak edo urarekin sortzen diren arazoak konpontzeko egiten dituzten lanak”. Argazkian, Romo ikastetxea / © Uribe Kostako IA.
Herri ikastetxeetan eta ikastoletan 2010ean egindako hainbat lan zerrendatu ditu Hezkuntza zinegotziak: alarmak ipintzeko lanak esleitu dira (69.959,60 euro); sare elektrikoa egokitu da Juan Bautista Zabalan (13.400,19 euro) eta San Martinen (10.469,35 euro), eta iraunkortasun seguruaren aldeko pista egokitu du Aiboan (28.882,10 euro). Bestalde, 39.939,98 euro emango dituzte, udan pintatze lanak egiteko Larrañazubi ikastetxean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun