Algortako Aldapa plaza eta bere inguruak berritu eta modernizatzeko proiektuaren gaineko erakusketa zabalik dago jada, Neguriko Gernika parkean egindakoari lekukoa hartuz. Erakustokia plazan bertan kokatuta dago. Udalak azaldu duenez, "bostehun lagun inguruk bisitatu dute Gernika parkeko erakusketa, eta, guztira, 112 iradokizun aurkeztu dituzte hurbildutakoek". Imanol Landa Getxoko alkateak gaur Aldapan nabarmendu duenez, "herritarren partaidetzaren aldeko apustua azpimarratu nahi dugu. Partaidetza ez da bakarrik erakusketa honetan izango. Auzoz Auzo ekimenaren harira orain arte auzotarrekin izandako batzarrak eta gerora ere horien ordezkariekin proiektuari buruz duten iritzia ezagutu eta horren arabera jarduteko izango ditugunak ere parte hartzeko modua ere badirelako”. Tokiko agintariaren arabera, gauza bera egin dute Itzubaltzeta / Romoko Gobelaurre parkearekin. Argazkian, Imanol Landa alkatea Aldapa parkeko erakusketa aurkezten.
Plaza hori, Aldapa auzoko aisialdi eta jolas gunerik garrantzitsuena da, eta hori birmoldatzeko, 1.100.000 euro inguru inbertituko dituzte Toki Inbertsiorako Estatuko Funtsaren kontutik hartutakoak. Lanak 4.300 metro koadroko eremuan izango dira eta urte bukaerarako amaituta egon daitezkeela azaldu dute Udalekoek. Horien arabera, plazan oinezkoentzako ibilbideak zabaldu, oztopo arkitektonikoak kendu, kirola egiteko gunea egokitu, umeentzako jolas berriak jarri eta gurasoek bertan egoteko gunea ipiniko dute mahai eta aulkiekin. Horrekin batera, kirol anitzeko pista, umeentzako rokodromoa eta gimnasiako aparatuak izango dira. Parkeak lorategi eremu handia izango du. "52 zuhaitz izango ditu guztira. Lehenagotik zeuden tamaina handieneko aleak kontserbatuko dira, lekuz aldatu behar direnak aldatu egingo dira eta zuhaitz berriak landatuko dituzte pasealekuetan", Landak azaldu duenez. Hala ere, hainbat auzokidek haien kezka azaldu dute, ez baitute inola ere landatuta dauden zuhaitzak modu batean edo bestean aldatzea ikusten. Parkearen proiektua jendaurrean erakutsiko da datozen egunetan, gaurtik eta hilaren 16ra arte. Erakusketaren ordutegia 16:00etatik 20:00ak arte izango da, astelehenetik ostiralera, eta 11:00etatik 14:00ak arte eta 16:00etatik 20:00ak arte, asteburuetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun