Getxoko Udalak 40.000 euro banatuko ditu udalerriko ikastetxeek, gurasoen elkarteek edo hainbat taldek 2010-2011ko ikasturtean eskoletan euskara sustatzeko antolatuko dituzten eskola-orduz kanpoko jardueretarako. Eskaerak maiatzaren 10etik 28ra aurkeztu beharko dira udaletxeko erregistro orokorrean, herritarren arretarako bulegoetan, Udaltzaingoaren bulegoan dagoen herritarren arretarako gunean edo legeak zehazten duen beste moduren batean. Udalerrian dauden 17 irakaskuntza zentroetatik 2009an 12tan jaso zituzten diru-laguntzak, guztira 108 proiektu aurrera eramateko. Aurrekoan baino 34 gehiago. Datorren ikasturteari begira, euskararen erabilera aktiboa eta ahozkotasuna sustatzen dituzten jarduerak lehenetsiko dituzte, udal iturriek zehaztu dutenez. Argazkian, udal arduradunak Algortako Egunsentia haur eskolan / © Getxo.net.
Diru-laguntzak honako hauetarako izango dira: ikastetxean, euskara sustatzeko helburu nagusiarekin garatzen diren plangintza integralen barruan txertatuta dauden eskola-orduz kanpoko jarduerak; eskola orduz kanpo (autobusean, jolasgunean eta abar) garatzen diren jarduerak; sentsibilizazio eta motibazio saioak; eskola-umeekin egiten diren asteburuetako irteera eta jarduera ludikoak, hirietan garatzen diren koloniak , udalekuak eta antzekoak; euskaraz garatzen diren jaiak; eskolako jarduera arruntaz aparte, ikasleek argitaratzen dituzten aldizkari, komiki, ikus-entzunezko eta abar, beti eta, ikastetxearen eremuan argitaratzen badira eta euskararekin, euskararen historiarekin edo hizkuntzarekin lotura duten jarduerak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun