Getxo Kirolak udal erakundeak Bolue 1 eta 2 zelaietako markesinak (partiduak ikustera doazenak euritik babesten dituztenak) kentzeko agindua eman du, egituretan akatsak aurkitu dituztelako. Iaz jarri zituzten horiek. Udal iturriek zehaztu dutenez, futbolari gazte batek pasa den astelehen gauean izandako ezbeharraren ondotik hartu dute erabakia. Estalkitik eskegi eta gero, behera etorri zen, metalezko egiturak ezin izan ziolako mutilaren pisuari eutsi. “Pertsonen segurtasuna da lehentasuna. Hartara, premiaz jokatu behar izan dugu istripu berririk jazotzea ez dugulako nahi. Sentitzen dugu gertatutakoa eta barkamenak eskatzen ditugu, bai ezbehar horrengatik, bai aipatu pergolak aldatzerakoan sortuko diren traba eta eragozpenengatik”, adierazi du Alvaro Gonzalez Kirol zinegotziak. Istripua izan zuen gazteak eskumuturra hautsi zuen. Argazkian, udal arduradunak Bolua 3 futbol zelaiko lanak aurkezten 2009ko otsailean / © Getxo.net.
Istripua gertatu ondoren, Getxo Kirolen arduradunek udal teknikariei, markesinak ipini zituen enpresakoei zein obraren arkitektoari, zelai horietako pergola guztiak ikuskatu eta aztertzeko eskatu zieten, Getxoko Udalak aipatu duenez. Lantegian erabat aurrefabrikatutako eta galvanizatutako altzairuzko elementuak dira. Ikuskatzea egindakoan, obraren ardura duen arkitektoak akatsak aurkitu ditu euskarriak eginda dauden tutuen soldaduran eta lodieran. "Tutuen diametroa fabrikazio-ziurtagirian egiaztatutakoa baino txikiagoa da. Halaber, aipatu egituren egileak erantsitako ziurtagiriak dioen moduan, galvanizatutako elementua bada ere, korrosio puntu batzuk aurkitu ditu", azaldu dutenez. "Egituretan dauden arazoak enpresa kontratistak beharrak txarto egin dituelako sortu direla" ere adierazi du txostenean arkitektoak; baita "akatsak ezin izan direla ikusi piezak obrara amaituta iritsi direlako" ere. Alvaro Gonzalezen arabera, fabrikazio akatsa denez gero, "kontratatutako enpresak berandu baino lehen aldatuko ditu". Ordura arte, estalki horiek ez dira erabiltzeko moduan izango Fadurako futbol zelaietara hurbiltzen diren 2.000 bat lagunentzat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun