Getxoko Udalak duela urte batzuk eskualdeko ondare etnografiko eta linguistikoa jaso eta zabaltzeko martxan jarritako bidean beste pauso bat da proiektua. Duela aste batzuk martxan jarritako Ondare Udaberria zikloko beste jarduera bat ere bada. Bestalde, Imanol Landak jakinarazi zuenez, “inguruko udalerriekin elkarrekin lan egiteko borondatea erakusten du. Zentzu horretan, aurten ere ondareari buruzko bi monografia egiteko beste lankidetza hitzarmen bat sinatu dugu Uribe Kostako Mankomunitatearekin, Erandio eta Leioako udalekin. Eta hemendik aurrera ere lanean jarraituko dugu gure altxorra den euskara berreskuratzeko eta zabaltzeko helburuarekin, hori baita gure konpromisoa”. Ekimen horren kostua 105.500 eurokoa izan da, eta Getxoko Udalak horren %51a jarri du. Uribe Kostako Mankomunitateak, berriz, gainontzekoa. Hala ere, proiektuak Bizkaiko Foru Aldundia eta Eusko Jaurlaritzaren laguntzak ere izan ditu.
Eskola materiala
Bildutako informazio guztiarekin lau liburuen bilduma eta DVD bat kaleratu dituzte. Liburu horiek, arduradunek adierazi dutenez, "eskola curriculumean txertatuta eta Haur eta Lehen Hezkuntzetako, 0 eta 12 urte bitarteko, umeei zuzenduta daude". Uribe Kostari buruzko informazioa ugaria da: auzoen eta etxeen izenak, bertako ohiturak, ondoko basoetako landareak eta animaliak, sinesmenak, esaerak... Materiala bi euskarri ezberdinetan banatuko dute: liburuak eta DVDa. Akaitze Kamiruagak esan zuenez, "unitate didaktikoak oso erakargarriak dira umeentzat eta ahozkotasunari ematen zaio garrantzia". Gainera, "orain arte era naturalean gertatzen zen belaunaldien arteko, hau da, aitite-amama eta iloben arteko transmisio, kasu askotan galdu denez, materialak beraien arteko zubia izan nahi du euskara eta bizimodu tradizionalak gal ez daitezen. Aitite-amama ez dituzten haurrek eskola materialarekin edukiko dituzte.”
Uribe Kostako azpieuskalkia eta horrek daukan aberastasun guztia jaso eta zabaltzea helburu dituen proiektuaren eskola materiala aurkeztu zuten atzo, prentsaurreko batean, Imanol Landa Getxoko alkateak eta Akaitze Kamiruaga Labayru Ikastegiko herri ondare taldeko arduradunak. Egitasmo hori aurrera atera ahal izateko, Getxoko Udalak eta Uribe Kostako Mankomunitateak 2005ean eta 2009an lankidetza hitzarmenak sinatu zituzten, eta 2005ean, Labayru Ikastegiari agindu zioten ekimena aurrera eramatea. Guztira, 120 bat euskaldun zaharri elkarrizketak egin zizkieten, eta euren erantzunen bitartez, hizkuntzaren eta bizimoduen ezaugarriak batu eta eskola materiala argitaratu dute. Horretan, lanbideen, jaiak ospatzeko moduen, familia giroaren kontakizunen eta abarren bidez hitz egiteko erabilitako hitzak eta esamoldeak batu dituzte, kanta, ipuin eta bertsoekin batera. Argazkian, 2009ko ekainaren 4an eskualdeko hizkuntza ondarea jaso eta zabaltzeko lankidetza hitzarmena sinatu zuten Getxoko Udalak eta Uribe Kostako Mankomunitateak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun