Pedro Horrillori eskainiko diote igandeko Fernando Astorki Txirrindulari Lasterketa
Urtero legez, Espainiako Biran 25 urtez medikua izan zenaren izena daukan lasterketa egingo dute igande honetan, maiatzak 9, Leioan. Bizkaiko topaketarik garrantzitsuenen artean dago Fernando Astorki Txirrindulari Lasterketa. Iaz, 400 pertsona baino gehiagok parte hartu zuten; horien artean, ziklista profesionalak eta Virginia Berasategi triatleta, besteak beste. Probaren 13. edizioa Pedro Horrillo txirrindulari eibartarraren omenez egingo dute. Iaz istripu larria izan zuen 35 urteko kirolariak. Maiatzaren 16an, Italiako Giroan Culmine di San Pietro mendatea jaisten ari zela eroriko larria izan zuen. 60 metroko amildegitik behera erori zen eta buruan kolpe gogorra hartzeaz gain, ezker hankako izterrezurra apurtu eta saihets ugari hautsi zituen. Bergamoko ospitalera eraman zuten eta koman sartu zuten. Zorionez, zaurietatik ondo osatu zen. Urtarrilaren 8an txirrindularitza profesionala izateari utziko ziola esan zuen, nahiz eta Rabobank taldeak kontratua berritzeko eskaintza egin zion. Argazkian, Pedro Horrillo / cc-by Puliarf.
Leioako proban izena emateko, irteera baino lehenago aurkeztu beharko dira parte hartzaileak, hau da, maiatzaren 9an, goizeko 9:30ak baino arinago. Aurretik ordaindu ezkero 10 euroko kostua izango du lasterketak. Bestalde, egun horretan 12 euro ordaindu beharko dute parte hartzaileek. Ibilaldia 95 kilometrokoa izango da eta ondoko tokietatik igaroko da: irteera Sakoneta kiroldegian, Lezama, Txorierri, Gernika, Mungia, Andraka, Plentzia, Urduliz, Unbe, eta amaiera Sakonetan, 14:00etan gutxi gorabehera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun