"Getxo akordaten naz" dokumentalaren bigarren zatia estreinatuko dute ostegunean
Ostegun honetan, hilaren 13an, "Getxo akordaten naz" dokumentalaren bigarren zatia estreinatuko dute Getxoko Andra Mari elizan, Isidro Deunaren jaien eta Euskara Zerbitzuak azken asteotan antolatutako Ondare Udaberria zikloko azken jardueraren barruan. Udalaren 10.000 euroko diru-laguntzarekin, "UK" Uribe kostako aldizkariaren ekoizpena da lan hori, Aitor Gisasolak zuzenduta. Fredi Paiak elkarrizketak eta lekukoen aukeraketa egin du, bertako nagusien oroimena gordetzeko asmoz. Horrela, udalerriko 70 urtetik gora dituzten 9 lekukoren bitartez, euren bizipenak ikusi eta entzuteko aukera egongo da. Izan ere, dokumentalean, horien ume garaiko Getxoko deskribapena ezagutu ahal izango da: Telletxe inguruko baserriak, Labe Garaiek kostaldean botatako gauzen berrerabilpena, umeen jolasak, herri medikuntza eta abar luze bat. Argazkian, dokumentalaren kartela / © Getxo.net.
Lanak 40 bat minutuko iraupena du. Irudi zaharrak eta gaur egungoak tartekatzen ditu eta, bertan, hainbat ideia islatzen dira, esate baterako, gerra aurretiko historiak eta bizimoduak, euskara legez kanpokotzat jotzeko saiakerak, naturarekin orekan bizi zen Getxoko herria eta gizartea aldarrikatzea... Baina, garrantzitsuena, zailtasun guztien gainetik, gure euskarak bizirik irautea lortu dutenei esker ona eskaintzea izango da. Horregatik, proiekzio egunean, Aixerrotaren erreprodukzio txiki bat opatuko diete lekukoei.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun