Isabel Celaa Hezkuntza, Unibertsitate eta Ikerketa sailburuak bihar jakinaraziko dio Gobernu Kontseiluari nor izango den Araba, Bizkaia eta Gipuzkoako Eskola Kontseiluko presidente berria, Konrado Mugertza Urkidi neguritarra ordezkatzeko, Eitb.com agerkariak zabaldu duenez. Hedabide publikoaren arabera, Jaurlaritzak ohar baten bidez aurreratu du presidente berria Maria Luisa Garcia Gurrutxaga izango dela. Garcia 1959an jaio zen eta Euskal Filologian lizentziatua da. Gipuzkoako PSE-EEko Batzorde Exekutiboko kidea da, Hezkuntza eta Kultura Idazkaritzaz arduratzen dela. 2008n Espainiako hauteskundeetara aurkeztu zuen PSE-EEk, Gipuzkoako zerrendako laugarren zihoala. Ordezkapena hilaren 14ean gauzatuko da. Argazkian, Mugertza ezkerrean; Jokin Aspuru eta Gorka Oruetarekin "UK" Uribe Kostako aldizkariaren 10. urteurrenean 2008ko abenduaren 4an.
Garcia Gipuzkoako zenbait herritako Lehen eta Bigarren Hezkuntzako irakaslea izan da, baita ere Laguntza Zerbitzuetako aholkularia Donostiako berritzegunean Ingeleseko espezializazioa du eta bi urtez irakasle lanak egin zituen Kalifornian. Bereziki esperientzia eleaniztunen aholkularia izan da, bai ikastetxe publikoetan eta bai ikastoletan ere, eta duela urtebetetik hona Hezkuntza Saileko Hezkuntza Berriztapen Zuzendaria izan da, "marko hirueledun berriaren diseinuan parte hartze nabarmena izan duelarik", Jaurlaritzak azaldu duenez. Euskadiko Eskola Kontseiluko presidentea Hezkuntza Berriztapen Zuzendaria izan da Anjeles Iztueta eta Tontxu Campos sailburuen agintaldietan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun