Bertso-paper Lehiaketako aurtengo gaia “Nola azalduko zenioke kanpotar bati nolakoa den Getxo” izan da. Zortziko txikian erantzun behar izan dute parte hartzaileek eta, gainera, eskatutako horren irudia egin ere. Aurreko hiru edizioetan 300dik gora bertso sorta izan ziren. Aurtengo irabazleak Fermin Reinicke (San Nikolas ikastola), Ander Otegi (Romo LHI) eta Aitziber Pulido (Zubilleta LHI) izan dira. Horiekin batera, ikastetxe bakoitzean hainbat sari ere banatu dituzte. Bertsolaritza eskoletan udalerriko ikastetxe eta ikastoletako Lehen Hezkuntzako 5. eta 6. mailetako eta Derrigorrezko Bigarren Hezkuntzako lehenengo mailako 556 gaztetxok hartu dute parte aurtengoan. Dantza eskoletan, berriz, 1.676 eskola-ume izan dira eta abestiak ikasten 328 gazte.
Bizkaiko Eskolarteko Bertso-Idatzien kanporaketa
Asteazken honetan, maiatzak 11, Bizkaiko Eskolarteko Bertso-Idatzien kanporaketa izango da Algortako San Nikolas ikastolan, ALBEk jakinarazi duenez. Bertan, bertso-eskolan eta eskolaz kanpokoetan dabiltzan ikasleak zein hezkuntza arautuan ikasten dutenek parte hartuko dute. Ordua 15.00etan jarri dute. Finala, berriz, ostiralean egingo dute, 15.00etan, Gernikako Seber Altube ikastolan.
Ikasitako dantza, kanta eta bertsoak erakutsiko dituzte ostiralean Getxoko eskola-umeek
Getxo udalerriko eskola-umeek ostiral honetan, maiatzak 14, ospatuko dute Euskal Egunaren zortzigarren edizioa. Bertan, ikasturtean ikasitako dantza, kanta eta bertsoak erakutsi ohi dituzte 6 eta 12 urte bitarteko neska-mutilek. Horrenbestez, hamar ikastetxetako mila haurrek parte hartuko dute, goizeko 10etatik aurrera, Algortako Fadura kiroldegian egingo den jaian. Eskola-umeek Zazpi jauzi, Esku-dantza eta Txulalai bezalako dantzak egingo dituzte eta, kanten artean, "Ala Kinkiri", "Behin Batian Loiolan", "Maritxu Nora zoaz" eta "Guk euskaraz" abestuko dituzte. Bestalde, Areetako Andres Isasi Udal Musika Eskolan, Getxoko Bertsolari Gaztetxoen X. Eguna ospatuko dute goizeko 10:30etik aurrera. Algortako Bertsolari Eskolak (ALBE) eta Getxoko Udaleko Euskara Zerbitzuak antolatuta, 200 gaztetxok parte hartuko dute ospakizunean. Bertan, bertso-eskolako neska-mutilek antzerki saio bat eskainiko dute, ikasgeletan ikasleek prestatuko saioa izango da, bertso-jolasak, “Balendin Txiki” IV. Bertso-paper Lehiaketako sariak banatuko dituzte eta bertso saioa izango da Amets Arzallus, Iker Zubeldia eta Jone Uria bertsolariekin. Argazkian, Getxoko Bertsolari Gaztetxoen Eguna, iaz / © ALBE.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun