Getxo udalerriko We Are Standard taldeak hartuko du ostegun iluntzean ETBren hirugarren katea. Izan ere, Gaztea irrati publikoaren 20. urteurrena dela eta, ETB3k emititzen duen "Gazteak 20 urte" saioaren barruan ikusi ahal izango da getxoztarrek iaz Irunen emandako kontzertua. Hortaz, etzi, Bidasoaldeko Ikultur jaialdian jotako hainbat abestiz gozatu ahal izango da, Gazteak antolatutako kontzerturik onenen laburpena eskaintzen duen "Gazteak 20 urte" saioan. ETBk iragarri duenaren arabera, programa "23:00etatik aurrera" emitituko dute, baina katearen programazio atalean ordu horretan "4. denbora" rugby saioa aurreikusita dago. Kasu horretan, We Are Standard-en saioa 23:40an hasiko litzateke. Edozein kasuan, aurretik "Hitzetik Hortzera" bertsolaritza saioa izango da, 22:10ean. Argazkian, We Are Standard taldea Madrilen emandako kontzertu batean / cc-by-nc-sa Andor.
We are Standard Getxo udalerrian sortu zen 2002an, eta punk-funk eta dance-rock estiloak uztartzen ditu. Taldea bost pertsonek osatzen dute: Deu Txakartegi, Jon Agirrezabalaga, Javi Leta, D.W. Farringdon eta Juan Escribano. Haien lehen diskoa, "3.000 V-40.000 W", 2006ko martxoan publikatu zuen Mushroom Pillow diskoetxeak, eta harrera ona izan zuen zaleen artean. Dena dela, behin-betiko arrakasta 2008 urtean etorri zitzaien, "We Are Standard" izeneko bigarren diskoa publikatu zutenean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun