Portuen eraldaketaz mintzatuko da iluntzean Algortan Iñaki Uriarte arkitektoa
Iñaki Uriarte arkitekto bilbotarrak "Plazas del agua. Metamorfosis del espacio portuario en las villas vascas" hitzaldia eskainiko du gaur, arratsaldeko 7:30etan, Algortako Villamonte kultur etxean. Gorrondatxe Kultur Elkarteak antolatuta, hitzaldian pisu handia izango dute irudiek. Izan ere, Baiona eta Bilbo arteko kai, moila eta portuen inguruen eraldaketa azaltzeko, era guztietako irudietan oinarritutako kontakizuna egingo du Iñaki Uriartek. Horrela, besteak beste, argazkiak, antzinako plano eta postalak, margolan eta grabatuen erreprodukzioak erabiliko ditu, Euskal Herriko itsas portuetako espazioen bilakaerari buruzko hausnarketa eta azterketa eskaintzeko asmoz. Tartean, eskualdeko Plentzia eta Algortako portuak ere hizpide ditu diaporaman. Uriarteren esanetan, "Itsas eta itsasadar bazterretan, itsas labarraren gainean edo hareatzaren ondoan eraikinen multzoak eta kaleak sortu izan dira. Baldintza geografiko egokiek, historian zehar arrantzarekin eta nekazari zein artisau produktuen merkataritzarekin loturiko itsas jarduerak garatzea erraztu dute". Argazkian, Iñaki Uriarte arkitektoa Begoña Gazteluko galeriei buruzko azalpenak ematen / © Getxosarea.
Dena den, arkitektoak nabarmendu duenez, "kostaldeko herri guztiek ez dituzte kontakizun honetan nabarmenduko direnen moduko ur aurreko espazio irekiak izan eta ez dituzte portuak ziren bezala gorde, baina bakoitzak badu berezko garapena eta historia". Halere, bere hitzaldian, "Ekialdetik mendebaldera, Baionatik Bilbora aurkitzen ditugun portu eta espazioak azalduko dira irudien bitartez, euren urbanismo eta historian oinarrizkoak diren plaza hauen errepertorio anitzaren berezitasunak aztertuko dira".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun