Azken atxiloketak salatuko dituzte bihar gazte independentistek. Goizean unibertsitate eta ikastetxeetan egingo dituzte geldialdiak eta mobilizazioak. Arratsaldean, berriz, hainbat herrietan izango dira protestak. Ostegunean atxilotutako Olatz Izagirre, Carlos Renedo, Asier Coloma eta Gaizka Likona gazteak iazko azaroan atxilotzen saiatu ziren, Hego Euskal Herrian. Gazte mugimenduaren kontrako polizia operazioa hartan 34 neske-mutil atxilotu zituzten. Izagirre, Renedo, Coloma eta Likona ez zituzten atzeman, eta "errepresiotik ihesi", Lapurdin bizi ziren orduz geroztik. Laurek bizitza normala egiten zuten han, Amnistiaren Aldeko Mugimenduak adierazi zuenez. Paueko Auzitegiak atzo aztertu behar zuen lau gazteen aurkako euroagindua, baina auzia bertan behera geratu zen eta heldu den asteartean egingo dute, goizeko 9etan, AAMk jakinarazi duenez. Izan ere, Espainiako Auzitegi Nazionalak igorri behar zituen agiriak falta ziren eta abokatuak ez du defentsa prestatzeko aukerarik izan. Horregatik auzia atzeratu egin behar izan dute. Argazkian, larunbatean Hernanin iragarri bezala, gazte independentistek kontzentrazioa egin zuten atzo Bilbon, Frantziako Kontsulatuaren aurrean / cc-by-sa Topatu.info.
Larunbatean prentsaurreko jendetsua egin zuten Hernanin gazte independentistek. Salatu zutenez, azken polizia operazioak agerian utzi du Frantziako Estatuak "kolaboratu" egiten duela "Espainiaren estrategiarekin". Bi estatuek, gisa horretako polizia operazioak egiten dituztenean, euskal gazteek independentziaren alde egiten duten lana "kolpatu" nahi dutela salatu zuten. Era berean, gazte horien aurka jotzeko, "akusazio faltsuak" eta "propaganda mediatikoa" erabiltzen dutela nabarmendu zuten. "Independentziaren alde diharduen gazte belaunaldi oso bat baldintzatu nahi dute, Segikoak izatearen aitzakiapean atxilotu, inkomunikatu, espetxeratu eta gure herrietatik ateratzen gaituzte", salatu zutenez. Hiru urtean, 150 gaztetik gora atxilotu dituzte Segikoak izatea leporatuta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun