Javier Martinezen “Kalejira” lana izango da Barrikako San Juan jaietako irudia
Javier Martinez Garaialdek irabazi du Barrikako San Juan Jaietako II. Kartel Lehiaketa, "Kalejira” izenburuko lanarekin. Ondorioz, hori izango da aurtengo festak iragartzeko erabiliko duten irudia. Martinezek bigarren urtez jarraian izan da garailea, iaz “Trikitixa” bere lana izan baitzen saritua. Aurtengo lehiaketako partaidetza iazkoa baino txikiagoa izan da, gutxigatik bada ere, lau lan aurkeztu baitira. Alabaina, epaimahaiak guztien kalitate handia azpimarratu du. Azkenean, “Kalejira” hautatu dute “pizten duen zirraragatik, bere sormenagatik eta mezuagatik”. Epaimahaia ondokoen osatu dute: Matilde Marcos eta Beatriz Soler Arte Ederretako doktoreak, Maria Esther Etxegarai zinegotzia eta Juan Jose Ezpeleta alkatea. Sari banaketa atzo egin zuten, 19:00etan, Barrikako Kultur Etxean (Txintxilandia eraikina). Irabazleak 500 euroko saria jaso zuen. Martinez sopeloztarra da eta honelako lehiaketatan esperientzia zabala du, sarritan hartzen baitu parte. Argazkian, Javier Martinez Garaialde Juan Jose Ezpeleta alkatearekin / © Joseba Zubiaur - Barrikako Udala.
“Kalejira” laneko egilea pozik agertu zen: “Ilusio handiz hartzen dut parte lehiaketatan nahiz eta batzuetan nire lanarekin erabat gustura gelditu ez. Obra honekin, baina, konforme nengoen eta pozgarria da epaimahaiak ere ongi baloratu izana”, azaldu zuenez. Kartelean, txistularia irudikatu du, danborrarekin, Barrikako armarria atzean duela. Kartela eskuz margotu du, pintzela eta gouache pintura erabiliz. Egileak azaldu zuenez, “euskal jaia islatzen saiatu naiz atzen itsasoa jarriz. Gainera hori Barrikako armarrian azaltzen da. Estiloari dagokionez, sarritan neurriz kanpoko elementuak uztartzen ditut, gorputza, burua eta eskuen artean”. “Koloreari garrantzi handia ematen diot, ikuslearen arreta dei dezan eta oharkabean gera ez dadin. Zehazki, hondoko koloreak Barrikako armarrikoak dira eta aurreko figuran berdea erabili dut kontrastea handiagoa izan dadin atzeko partearekin”, laburbildu zuen Martinezek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun