Antolatzaileek azaldu dutenez, "jai herrikoien aldeko aldarrikapena egitea da helburua, Getxo udalerriko egoera koadrilen artean zabalduz, jendea jai ereduaren kontrako erasoen inguruan kontzientziatzeko". Horretaz gain, Bilboko Konpartsen Koordinakundeak, Donostiako Piratek, Gasteizko blusa, nesken eta txosnen batzordeak eta Gora Iruñea plataformak sustatutako Euskal Herri mailako ekimenarekin bat egin nahi dute horrela. Dagoeneko Uribe Kosta eta Erandioko jai batzorde, txosna batzorde eta eragile ugarik izenpetu dute "Jai herrikoiak bultzatuz!" izeneko adierazpena. Horren harira, Jai Herrikoiek I. Kongresua izango da, maiatzaren 22an, Bilboko Capitol zinemetan.
Getxo udalerriko eragileek zabaldutako idatzia:
Getxon ere jai herrikoien alde!
Herria pertsonen arteko solasa da, akzioa, joan etorria, talka. Etenik gabeko mugimendua. Herritarrok gure bultzadekin, gure ufadekin, gure hatsarekin, gure pausoekin eraikitzen dugu atergabe. Espazioan eragiteak bihurtzen gaitu herritar. Akziorik ezean, ez da herririk.
Jaiak, herria eraikitzeko eta bizirik mantentzeko beste bide bat dira. Herriko elkarte, kolektibo eta banakoak buru-belarri gabiltza jaien eta herri-kulturaren dinamizazioan. Jai herrikoietan sinesten dugulako parte hartzen dugu sormen prozesu horretan; herriak gozatu eta herriak eraiki ahal dituen jaiak nahi ditugulako.
Tokian tokiko hainbat erakunde publiko eta alderdi politiko, baina, sator-lanetan dabiltza eredua pitzatu nahian, ahuldu guran. Modu askotako erasoak sufritu ditugu azken urteotan.
Euskal Herri mailan gertatutako erasoak izan direnak, Getxon ez dira falta izan: zenbait kolektiboei txosna jartzeko debekua, jaiak antolatzeko oztopoak, diru laguntza eskasak, jai batzordeei eskumenak murriztea etab. Herri-jaien mugimendua osatzen dugun guztiok, ereduaren izatea eta baliotasuna berresteaz bat, haren kontrako erasoak ere salatu nahi ditugu. Ez dugu onartuko inolako erakunderik zapaltzea, ohiturak eta herriaren nahiak urtetan zehar elikatu duen jai eredua.
Guztiok gozatu ahal ditugun jaiak aurrera ateratzeko, guztion indarrak batu behar ditugu. Zu eta zure lagunak behar-beharrezkoak zarete jai herrikoien aldeko olatu erraldoia sortzeko. Adi egon herrian egingo diren ekimenei eta animatu parte hartzera! Guztion artean herriak nahi dituen jaiak lortuko ditugu! Gora Getxoko jai herrikoiak!
Ekainaren 12rako, larunbata, jai herrikoien aldeko olinpiadak antolatu dituzte, festen antolaketan parte hartu arren, Getxoko Udalak 2009an txosna jartzeko baimena eman ez zien hainbat eragilek (Koska Irratia, Txorimalo gaztetxea, Bilgune Feminista...). Horrenbestez, 17:00etan jarri dute hitzordua, egun horretan, Algortako Telletxe plazan, proba ezberdinak izango dituen txapelketa dibertigarria eta parte hartzailea egiteko asmoz. Ondoren, ekitaldia egingo dute. Eta arratsaldeari bukaera emateko, poteo musikatua herrian zehar. Horrenbestez, arratsaldean abiatuko diren Getxoko San Isidro jaietan, olinpiadetan izena emateko aukera izango dute koadrilek. Txosnan egongo da kutxa, inskripzio orria bete ostean, bertan sartzeko. Horiek guztiak batuta, zozketa egingo dute, ahalik eta lasterren lehiakideen izenak ezagutarazteko. Argazkian, orain egun batzuk aurkeztu zuten Bilbon maiatzaren 22ko Jai Herrikoiek I. Kongresua / © Bilboko Branka.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun