Sopelako saioan bihar arituko diren bertsolariak (puntuatuko dituztenak):
- Unai Angulo (1971, Algorta, Getxo): Informatika enpresa bateko langilea eta Algortako Bertsolari Eskolako (ALBE) kidea.
- Arkaitz Gomez "Arkan" (1977, Getxo): "Batez ere sorosle eta tabernari lanetan ibili naiz. Gaur egun Sarrikon bizi naiz eta bertsotan lagunekin egitea gustuko dut".
- Peio Etxebarria "Bonbero" (1963, Algorta, Getxo): Suhiltzailea da ofizioz eta taberna bertsolaritzat edo lagunarteko bertsolaritzat dauka bere burua. Uribe Kostako txapelketa ez du "txapelketa moduan hartzen", eta horregatik parte hartuko du. Orain arteko Ipar Uribeko txapelketa denetan moduan.
- Itxaso Paya (1988, Algorta, Getxo): Ikus-entzunezko Komunikazio eta Arte dramatikoko ikaslea. Bizkaiko Eskolarteko Bertso idatzien lehiaketan hainbat sari jasotakoa, bat-bateko Bizkaiko Eskolarteko Bertsolari Txapelketan txapeldunorde izan zen 2005an eta txapeldun 2006an. Urte horretan Bizkaiko Bertsolari Txapelketan ere parte hartu zuen eta Ipar Uribeko txapela jantzi. Hirugarren txapelketa du aurtengoa.
Uribe Kostako bertsolari txapelketako hurrengo saioak:
Maiatzak 21, ostirala
Bigarren kanporaketa Itzubaltzeta / Romoko Itzubaltzeta gaztetxean. Afaria 21:00etan hasiko da eta ostean izango da saioa. Bertsolariak: Oier Iturralde "Atano", Peio Ruiz de Agirre, Arrate Illaro, Peio Arondo, Josu Landeta eta Gabi Basañez.
Maiatzak 28, ostirala
Hirugarren kanporaketa Getxoko Txorimalo gaztetxean. Afaria 21:00etan hasiko da eta ostean izango da saioa. Bertsolariak: Joanes Igeregi, Miren Loizaga, Aitzol de Kastro, Jone Uria, Ekaitz Larrazabal “Katxo” eta Jagoba Pereda.
Ekainak 12, larunbata
18:00 Finala Algortako Villamonte kultur etxean.
Zazpi beharrean, zortzi izango dira aurten Bizkaiko Eskualdeetako Bertsolari Txapelketak. Ipar Uribeko sariketan, 20 bat lagun lehiatu ziren orain bi urte, Uribe Kosta, Mungialdea eta Txorierri eskualdeak batzen dituen makroeskualdean. Aurten, baina, bitan banatu dute. Horrenbestez, Uribe Kostako txapelketan 18 bertsolarik parte hartuko dute. Ostiral honetan, maiatzak 14, egingo dute lehenengo kanporaketako bertso afaria, 21:00etatik aurrera, Sopelako Ander Deuna ikastolan. Sabelak bete ostean, Imanol Uria, Unai Angulo, Arkaitz Gomez "Arkan", Peio Etxebarria "Bonbero", Itxaso Paya eta Inazio Vidalek abestuko dute. Uria eta Vidal, baina, ez dituzte puntuatuko adinez txikiak izateagatik. Argazkian, Peio Etxebarria "Bonbero" Fikako kanporaketan, orain bi urte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun