Independentziaren aldeko Trivial erraldoiean jolastuko dira larunbatean Itzubaltzetan

Larunbat honetarako, maiatzak 15, giza Trivial erraldoia antolatu dute Itzubaltzeta / Romon, "independentziaren aldarrikapena lau haizetara zabaldu eta elkarrekin gure herriaren askapen borrokaren pasarte garrantzitsuenen bidez hausnartu, eztabaidatu eta jolasteko". Hitzordua 18:30ean jarri dute, Santa Eugenia plazan. Horrenbestez, tablero erraldoia prestatu dute, baita zortzi gairen inguruko galdera sorta ere: feminismoa, ama lurra, internazionalismoa, euskara, kirola, hezkuntza, historia eta okupazioa. Trivialaren ohiko jokoan bezala, dado erraldoia botaz, "gaztatxoa" lortuko du laukitxo egokian galderari zuzen erantzuten dionak; zortziak lortu arte. Taldekako jolasa izango da, eta hortaz, galderen erantzuna emateko garaian taldekideen artean adostu beharko dute. Txapeldunak independentziaren kamiseta gorriak izango dituzte sari. Dena den, parte hartzaile guztien ahalegina eskertzeko, parrillada egongo da Branka herriko tabernan, 21:00etatik aurrera. Gero musika emanaldia egongo da. Argazkian, gazte independentisten agerraldia Leioa eta Erandioko campusean.