Uribe Kostako ezker abertzaleak zabaldutako oharra:
Azken hamarkada hauetan, Euskal Herriak bizirik iraun dezan Ezker Abertzalea osatzen dugun guztiok lan handia egin dugu. Ezkerreko proiektu independentista gauzatzeko eta indartzeko ahaleginean elkarrekin ibili gara. Batzuetan asmatu egin dugu eta beste batzuetan kale egin dugu, baina independentzia eta sozialismoa eraikitzeko bideari ez diogu amore eman.
Azken hilabete hauetan eztabaida prozesu mamitsua eta gardena burutu dugu. Milaka eta milaka kideek Herri Batzarretan parte hartu eta gero, eztabaidaren ondorioak Zutik Euskal Herria agirian zehaztu ditugu. Aldaketa politikoa abian jartzea erabaki dugu. Aldaketa hori errealitatea bihurtzeko, indar metaketa eta herri aktibazioa beharrezkoak ditugu eta horiek ahalbideratze aldera gure aldetik beharrezkoak diren aldaketak eta urratsak egiteko aldebakarreko konpromisoa hartu dugu. Altsasuko agerraldia, Zutik Euskal Herria agiria edota duela gutxi Iruñean egin dugun adierazpena, norabide horretan emandako urratsak dira.
Baina ekimen nazional horiek ez dira nahiko. Herrietatik eta eskualdeetatik boikot mediatikoa eta intoxikazioa gainditu behar ditugu. Herritarrei gure apustuaren tamaina helarazi behar diegu. Hori dela eta, Uribe Kostan herri guztietako Ezker Abertzaleko kideak bilduko gara, eta bertan argazki indartsu bat aterako dugu. Nazional Mailan emandako urratsekin bat egiteaz gain, gure eskualdean dauden arazoei aurre egiteko aldaketa politikoa erabat beharrezkoa dela aldarrikatuko da.
Altsasuko agerraldia, "Zutik, Euskal Herria" agiria edota duela gutxi Iruñean egin duten adierazpenaren haritik, igande honetan, maiatzak 16, Sopelan egingo du agerraldia Uribe Kostako ezker abertzaleak. Hitzordua eguerdiko 12etan jarri dute Plaza Beltzean. Azaldu dutenez, "herrietatik eta eskualdeetatik boikot mediatikoa eta intoxikazioa gainditu behar ditugu. Herritarrei gure apustuaren tamaina helarazi behar diegu". Hori dela eta, herri guztietako ezker abertzaleko kideak bilduko dira, bertan "argazki indartsu bat" ateratzeko asmoz. Nazio mailan emandako urratsekin bat egiteaz gain, "gure eskualdean dauden arazoei aurre egiteko aldaketa politikoa erabat beharrezkoa" dela aldarrikatuko dute. Argazkian, otsailaren erdialdean egindako herrialde batzarretako bat / cc-by-sa Ezkerabertzalea.info.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun