Patxi Lopez lehendakaria ere bertan zela, gaur goizean jarri dute Uribe ospitalearen "lehenengo harria" Urdulizen. Agintari zein politikarien segizioak, baina, bizkartzain eta ertzain ugari eraman ditu inguruetara. Jarri nahi duten azpiegiturari aurkakotasuna agertzeko elkartu diren auzokideak gertu izan dituzte horiek. Lopez ekitaldira helduta, aurki gerturatu zaizkie Brigada Higikorreko lau ertzain, "SOS Santa Mariñe" pankarta atzean bildutako gazteei. Agintarien ingurura hurbiltzeko ahaleginik ez dute egin. Hala ere, poliziek bi mutil identifikatu dituzte. Bati erresistentzia eta desobedientzia delituak leporatzen diote, eta besteari irainak egitea. Epaiketa azkarra izango dutela esan diete ertzainek. Argazkian, identifikatutako lehenengo gaztea. Argazki gehiago ikusteko sakatu hemen.
Agintariak heldu artean, kalearen bestaldean batu dira gazteak eta gainontzeko auzotarrak. Ekitaldia iraun artean ere ez dute arazorik sortu. Politikariak lunchaz gozatzen ari ziren bitartean izan dira gora beherak. Halako batean, buelta emateko esan dio agenteetako batek independentziaren aldeko kamiseta gorria zeukan mutilari, "nonbaiten Segi jartzen zuen ikusteko edo", gazteak berak UKBERRI.NETi adierazi dionez. Horrek, ordea, ezetz erantzun dio eta lepotik hartuta eraman dute ertzainek. Gainontzeko agenteek oldartzeko mehatxuak egin dizkiete neska-mutilei, Brigada Higikorreko beste zortzi ertzain gerturatzen ari ziren bitartean. Gazteak apur bat atzera egin eta horretan geratu da kontua. Harrapatutako lehenengo mutila ordu erdi baino gehiagoz eduki dute atxikita. Hala ere, azkenengo minutuak ez ditu bakarrik eman. Berriro ere dena lasai zegoela zirudienean, ertzainetako batek mehatxua bota, beste batek pankartari heldu eta agenteetako bik beste mutil bat atzeman dute. Handik gutxira askatu dituzte biak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun