Areetako dinosauro parkea Getxoko Ekonomia Dinamizatzeko Ezohiko Planaren harira onartu zuten joan den urtean. Planak 3,2 milioi euroko inbertsioa agintzen du, "krisialdiari aurre egiteko" helburuarekin.
Erakusketa hori "hezkuntza eta aisialdiaz gainera, Getxora bisitariak erakartzeko helburua du eta, era horretan, hala nola, merkataritza eta ostalaritzaren jarduera sustatzeko eta udalerriko eskaintza turistikoa aberasteko ere", udal iturrien arabera. Besteak beste, Bizkaia Zubia, Portu Zaharra, Kirol Portua, hondartzak, ibilbideak eta jaialdiak bezalako baliabidez beteta dagoen ekimen horrekin bertoko proposamen turistikoa sustatzea, "oso ondo" hartu ei du Getxoko Merkataritza Mahaiak, "udalerrian aberastasuna bultzatu ahal izateko", Getxoko Udalak zabaldutakoari jarraiki.
Getxo Dinosauro Parkea ikusteko 3 euro pagatu beharko dituzte nagusiek, 2 euro umeek, eta 1,50 euro pertsonako 20 kide baino gehiagoko taldeek. Hala ere, "Getxoberri" udal astekaria eskuratuta doan joan ahal izango du nahi duenak. Erakusketa zabalik egongo da urriaren 31ra arte, 11:00etatik 14:00ak arte eta 14:00etatik 20:00ak arte.
Areetako dinosauroak ikustera 10.000 lagun baino gehiago hurbildu dira bi astetan
11.039 pertsonek bisitatu dute, orain arte, maiatzaren 1ean Areetako moilan zabaldu zen Getxo Dinosauro Parkea izeneko erakusketa. Getxoko Udalak jakinarazi duenez, pasa den asteburuan, maiatzaren 15 eta 16an, 2.124 bisitari joan ziren erakusketa ikustera, Kretazikoan eta Jurasikoan bizi ziren izaki ikusgarrienetako batzuen tamaina errealeko 16 erreprodukzioz osatutakoa. Horrela, ematen du bisitari kopurua egonkortzen ari dela, lehenengo asteburuko nobedadeak ekarritako 3.654 bisitariengandik urrun. Bestalde, Getxoko Udalak ez dio erantzun ere egin Marisa Arrue bozeramaile popularrak "arazo handiak" sortzen ei dituelako erakusketa kentzeko egindako eskaerari. Argazkian, Txurruka moilako dinosauroetako bat / © Getxo.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun