Atzo, astelehena, hasi ziren Areetako Negubide kaleko oinezkoentzako gunea birmoldatzeko lanak, Gobela ibaiaren aldamenean. Obra horien bitartez, Arenas Club parkeko (Itzubaltzeta / Romoko Errekagane parkea) pasealekuari eta bidegorriari jarraipena emango zaie Xake plazaraino, berdeguneak birmoldatzeaz gainera, Getxoko Udalak aipatu duenez. Bitartean, bihar, asteazkena, Areetako Ibaibide kaleko zati bat itxiko zaio zirkulazioari; Santa Ana eta Jolastokieta kaleen artekoa, alegia. Goizeko 8etatik 14:00etara egongo da horrela. Itxiera hori errepide erdian eta egoera txarrean dauden saneamenduko arketak hobetzeko lanak aurrera eraman ahal izateko izango da, udal iturriek zehaztu dutenez. Argazkian, Errekagane eta Xake plaza lotuko ditu bidegorriak.
Negubide kaleari dagokionez, gokituko den pasealeku tarte berriak 178 metroko luzera eta ia 3 metroko zabalera izango du eta bidegorriarenak 230 metro, Gobelaurre eta Ibaiganekoekin lotuz. Bestalde, berdegunearen azalera, guztira, 1.965 metro koadrokoa izango da. Lan horiek osatzeko 10 argi-puntu, Arenas Club parkean daudenen antzekoak, eta 8 banku ipiniko dituzte. Azken horiek ere aipatu parkean daudenen antzeko diseinua izango dute. Obrak direla eta, inguru guztia itxiko dute, ibilgailuen trafikoan trabarik eragingo ez badu ere, une jakin batzuetan baino ez bada. Halaber, oinezkoen bidea besteratuko dute behar denean, seinale egokien bitartez. Uste dute lan hauen iraupena 3 bat hilabetekoa izango dela eta horien aurrekontua 245.000 eurokoa izango da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun