Imanol Landa Getxoko alkateak eta Eskolako Agenda 21 ekimenean parte hartzen duten herriko 11 ikastetxetako ikasleek urteko batzarra egin dute, gaur goizean bertan, udaletxean. Ongi etorria egin eta gero, Agenda 21aren harira, aurten “Biodibertsitatea ekosistema urtarretan” gaiaren inguruan egindako lana eskertu die eskola-umeei tokiko agintariak. Aipatu ikastetxeek sei urte daramatzate ingurumen hezkuntzako egitasmo horretan lanean. Eskola mailan, baina zein udal mailan dihardute, Bolueko hezegunea eta herriko ibai eta hondartzak aztertzen. Azterketa egin ostean, diagnostiko bat egiten dute, eta hori amaitutakoan izaten da ikasle eta udal agintarien arteko foroa. Bertan euren kezkak, proposamenak eta konpromisoak azaltzen dizkiete tokiko mandatariei. Argazkian, eskola-umeak udal batzar aretoan / © Getxo.net.
Ikasleek ateratako ondorioak jendaurrean agertu eta gero, alkateak, horiek esandakoei eta proposatutakoei erantzun die. Eskola-umeen bi ordezkariek egindako proposamenen artean daude, esate baterako, Bolueko animaliei jaten ez emateko edo etxeko animaliak ingurune naturalean aske ez uzteko kanpainak egitea; herriko kale eta lorategiak euri urarekin ureztatzea; ikastetxeetan ura aurrezteko gailuak jartzea eta hondartza eta ibaietan hondakinak ez botatzeko kartelak ipintzea, udal iturriek nabarmendu dutenez. Aurtengo ikasleek hartutako konpromisoak dira, bestalde, udalerriko ekosistemak zaindu eta babestea; uraren erabilera kontrolatzea eta hondakinen gaikako bilketa handitzea, besteak beste.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun